ധാക്ക: ബംഗ്ലാദേശില്‍ കഴിയുന്ന റോഹിംഗ്യന്‍ അഭയാര്‍ഥികളുടെ പുനരധിവാസത്തിനായി 2018-2019 സാമ്പത്തിക വര്‍ഷത്തില്‍ പ്രത്യേക ഫണ്ട് വകയിരുത്തുമെന്ന് ബംഗ്ലാദേശ് ധനമന്ത്രി അബുല്‍ മാല്‍ അബ്ദുല്‍ മുന്‍ഹിത് പറഞ്ഞു. പുനരധിവാസത്തിനായി 400 കോടി ടാക്ക (318 കോടി രൂപ) വകയിരുത്തും. അഭയാര്‍ഥികളുടെ താമസത്തിനായുള്ള കെട്ടിട നിര്‍മാണങ്ങള്‍ക്കാണ് പ്രധാന ശ്രദ്ധ നല്‍കുക. ശുചിത്വം, ആരോഗ്യം, ഭക്ഷണ വിതരണം ഉള്‍പ്പടെയുള്ളവയ്ക്കും പണം നീക്കിവയ്ക്കുമെന്ന് അദ്ദേഹം പറഞ്ഞു. ബജറ്റ് ഇന്ന് പാര്‍ലമെന്റില്‍ പ്രഖ്യാപിക്കും.
നിലവില്‍ 10 ലക്ഷത്തോളം റോഹിംഗ്യകളുടെ താല്‍ക്കാലിക പുനരധിവാസത്തിനായി 2,312 കോടി ടാക്ക (1838 കോടി രൂപ) ദേശീയ സാമ്പത്തിക സമിതി നീക്കിവച്ചിട്ടുണ്ട്. ആദ്യഘട്ടത്തില്‍ ഒരു വര്‍ഷത്തിനുള്ളില്‍ ഒരു ലക്ഷം അഭയാര്‍ഥികളെ പുനരധിവസിക്കും.