എറണാകുളം: കൊവിഡ് പടരുന്ന സാഹചര്യത്തില്‍ പ്രവാസികളെ തിരിച്ചെത്തിക്കണമെന്നാവശ്യപ്പെട്ട് ദുബൈ കെ.എം.സി.സി നല്‍കിയ ഹരജിയില്‍ ഹൈക്കോടതി കേന്ദ്ര സര്‍ക്കാരിനോട് വിശദീകരണം തേടി.

വിസ കാലാവധി കഴിഞ്ഞവരടക്കമുള്ള പ്രവാസികള്‍ നിലവില്‍ വിദേശ രാജ്യങ്ങളില്‍ കുടുങ്ങിക്കിടക്കുകയാണ്. അവര്‍ വലിയ ബുദ്ധിമുട്ടുകള്‍ നേരിടുന്നുണ്ട്. ഇന്ത്യയിലേക്ക് പ്രവാസികളെ എത്തിക്കാനായി എമിറേറ്റ്‌സ് ഫ്‌ളൈറ്റ്‌സ് തയ്യാറാണ്. ഈ സാഹചര്യത്തില്‍ കൊവിഡ് രോഗമില്ലാത്തവരെ പരിശോധനയ്ക്ക് ശേഷം കൊണ്ടുവരാന്‍ നടപടികളുണ്ടാവണമെന്നതാണ് ഹര്‍ജിയിലെ പ്രധാന ആവശ്യം.

പ്രവാസികള്‍ നേരിടുന്ന പ്രയാസങ്ങള്‍ പരിഗണിച്ച് അവരെ ഇങ്ങോട്ടേക്കെത്തിക്കാന്‍ നയപരമായ തീരുമാനം ഉണ്ടെങ്കില്‍ അത് വിശദീകരിക്കണമെന്നാണ് കേന്ദ്രസര്‍ക്കാരിനോട് ഹൈക്കോടതി ആവശ്യപ്പെട്ടത്. അതേ സമയം പ്രത്യേക സാഹചര്യമാണ് ഇപ്പോള്‍ രാജ്യത്ത് നിലനില്‍ക്കുന്നത്. അതിനാല്‍ കേന്ദ്ര സര്‍ക്കാരിന്റെ നടപടികളെ ഈ ഘട്ടത്തില്‍ ചോദ്യം ചെയ്യാനാവില്ലെന്ന് ഹൈക്കോടതി പറഞ്ഞു.

അതിനിടെ കൊവിഡ് രോഗമില്ലാത്ത പ്രവാസികളെ നാട്ടിലെത്തിക്കാന്‍  തയാറാണെന്ന്‌ യു.എ.ഇ അംബാസിഡര്‍ മുഹമ്മദ് അല്‍ ബന്ന അറിയിച്ചിട്ടുണ്ട്.