പറ്റ്‌ന: ഐ.എസ് ഭീകര ബന്ധമാരോപിച്ച് അറസ്റ്റിലായവര്‍ക്ക് നിയമ സഹായം വാഗ്ദാനം ചെയ്ത എം.ഐ.എം നേതാവ് അസദുദ്ദീന്‍ ഉവൈസിയെ ജയിലിലടക്കണമെന്ന് ജനതാ ദള്‍ യുണൈറ്റഡ് (ജെ.ഡി.യു). ഐ.എസുമായുള്ള ബന്ധം ആരോപിച്ച് ഹൈദരാബാദില്‍ നിന്നും കഴിഞ്ഞ ദിവസം അറസ്റ്റ് ചെയ്യപ്പെട്ട അഞ്ചു പേര്‍ക്ക് നിയമസഹായം ലഭ്യമാക്കുമെന്ന ഉവൈസിയുടെ പ്രസ്താവനക്കെതിരേയാണ് ജെ.ഡി.യു രംഗത്തെത്തിയിരിക്കുന്നത്. ഇക്കാര്യത്തില്‍ ബി.ജെ.പിയും പ്രതിഷേധവുമായി രംഗത്തെത്തിയിരുന്നു. എന്നാല്‍ യുവാക്കള്‍ നിരപരാധികളാണെന്ന് തനിക്ക് ബോധ്യമുള്ളതിനാലാണ് നിയമസഹായം നല്‍കുമെന്ന് താന്‍ പറഞ്ഞതെന്നാണ് ഉവൈസിയുടെ മറുപടി. നേരത്തെ പാര്‍ലമെന്റിലും പുറത്തും തന്റെ ശക്തമായ നിലപാടുകളിലൂടെ ഓള്‍ ഇന്ത്യാ മജ്‌ലിസെ ഇത്തിഹാദുല്‍ മുസ്‌ലിമീന്റെ ഹൈദരബാദ് എം.പിയായ അസദുദ്ദീന്‍ ഉവൈസി രംഗത്തു വന്നിരുന്നു.