മുംബൈ: ശിവസേനയെ അനുനയിപ്പിക്കാനുള്ള അമിത്ഷായുടെ നീക്കം പാളി. സേനാ നേതാവ് ഉദ്ധവ് താക്കറെയുമായുള്ള കൂടിക്കാഴ്ച ഫലം ചെയ്തില്ലെന്ന റിപ്പോര്‍ട്ടുകളാണ് പുറത്ത് വരുന്നത്. ചര്‍ച്ചക്ക് ശേഷം എല്ലാ പ്രശ്‌നവും പരിഹരിച്ചെന്നായിരുന്നു അമിത് ഷാ പറഞ്ഞിരുന്നത്.
എന്നാല്‍ ബി.ജെ.പി പറഞ്ഞ കാര്യങ്ങളൊക്കെ തെറ്റാണെന്നാണ് ശിവസേന ഇപ്പോള്‍ പറയുന്നത്. ബി.ജെ.പിയുമായി യാതൊരുവിധ സഖ്യവും ഉണ്ടാകില്ലെന്ന് ശിവസേനയുടെ മുതിര്‍ന്ന നേതാവ് സഞ്ജയ് റൗട്ട് വ്യക്തമാക്കി. ഇനി വരുന്ന എല്ലാ തെരഞ്ഞെടുപ്പുകളിലും ഒറ്റയ്ക്ക് മത്സരിക്കുമെന്നും അവര്‍ വ്യക്തമാക്കി.
ഇതോടെ വരുന്ന ലോക്‌സഭാ തെരഞ്ഞെടുപ്പില്‍ നിര്‍ണായക സംസ്ഥാനമായ മഹാരാഷ്ട്രയില്‍ ബി.ജെ.പി കടുത്ത വെല്ലുവിളി നേരിടേണ്ടി വരും. ബി.ജെ.പിയെ രൂക്ഷമായി വിമര്‍ശിക്കുന്ന തരത്തില്‍ കഴിഞ്ഞ ദിവസം ശിവസേനയുടെ മുഖപത്രത്തില്‍ എഡിറ്റോറിയല്‍ വന്നിരുന്നു. ജനങ്ങളും ബി.ജെ.പിയുമായുള്ള ബന്ധം എന്നോ നഷ്ടമായി കഴിഞ്ഞെന്നാണ് മുഖപത്രത്തില്‍ പറയുന്നത്. ഇപ്പോള്‍ രാഷ്ട്രീയ പാര്‍ട്ടികളുടെ സഖ്യം അവര്‍ക്ക് ആവശ്യമാണ്. പക്ഷേ എല്ലാം അവരുടെ ആവശ്യങ്ങള്‍ക്കു വേണ്ടി മാത്രമാണെന്നും സാംന വിമര്‍ശിച്ചിരുന്നു.