മലപ്പുറം: ഡി.സി.സി ഓഫിസിനു മുന്നിലെ കൊടിമരത്തില്‍ മുസ്‌ലിം ലീഗിന്റെ കൊടി കെട്ടി പ്രതിഷേധം. രാജ്യസഭാ സീറ്റ് കേരളാ കോണ്‍ഗ്രസിനു നല്‍കാനുള്ള കോണ്‍ഗ്രസ് നേതൃത്വത്തിന്റെ തീരുമാനത്തില്‍ പ്രതിഷേധിച്ചാണ് ലീഗിന്റെ കൊടി കെട്ടിയത്. കോണ്‍ഗ്രസിന്റെ പതാകയ്ക്കു മുകളിലായാണ് ലീഗ് പതാക പ്രത്യക്ഷപ്പെട്ടിരിക്കുന്നത്.

മുഹമ്മദ് അബ്ദുറഹിമാന്‍ സ്മാരക ബില്‍ഡിങ്ങില്‍ പ്രവര്‍ത്തിക്കുന്ന ഡി.സി.സി ഓഫിസില്‍ കഴിഞ്ഞ ദിവസം രാത്രിയാണ് സംഭവമെന്നാണ് സൂചന. എന്നാല്‍, സംഭവത്തിന് പിന്നില്‍ ആരെന്ന് വ്യക്തമായിട്ടില്ല.

രാജ്യസഭാ ഉപാധ്യക്ഷന്‍ പി.ജെ കുര്യന്റെ കാലാവധി കഴിയുന്നതോടെ ഒഴിവുവന്ന സീറ്റിനായി കോണ്‍ഗ്രസില്‍ കലാപക്കൊടി ഉയര്‍ന്ന സാഹചര്യം നിലനില്‍ക്കെ, അപ്രതീക്ഷിതമായാണ് കേരള കോണ്‍ഗ്രസിന് സീറ്റ്‌നല്‍കാനുള്ള തീരുമാനം ഉണ്ടായത്.

ഇന്നലെ കേരള കോണ്‍ഗ്രസ് നിലപാടില്‍ ഉറച്ചുനില്‍ക്കുകയും കുഞ്ഞാലിക്കുട്ടി ശക്തമായി പിന്തുണക്കുകയും ചെയ്തതോടെ കോണ്‍ഗ്രസ് നേതൃത്വം പ്രതിസന്ധിയിലാവുകയായിരുന്നു.