കോഴിക്കോട്: കൊവിഡ്19 വ്യാപകമായിക്കൊണ്ടിരിക്കുന്ന സാഹചര്യത്തില്‍ ഇന്ത്യക്കാര്‍ താമസിക്കുന്ന വിദേശ രാജ്യങ്ങളിലേക്ക് മെഡിക്കല്‍ സംഘത്തെ അയക്കാന്‍ കേന്ദ്ര-സംസ്ഥാന സര്‍ക്കാറുകള്‍ അടിയന്തിര നടപടികള്‍ സ്വീകരിക്കണമെന്ന് സമസ്ത കേരള ജംഇയ്യത്തുല്‍ ഉലമാ പ്രധാനമന്ത്രിക്കും മുഖ്യമന്ത്രിക്കും അയച്ച നിവേദനത്തില്‍ ആവശ്യപ്പെട്ടു.

 

 ഇന്ത്യക്കാര്‍ പ്രത്യേകിച്ച് മലയാളികള്‍ കൂടുതലുള്ള ഗള്‍ഫ് രാഷ്ട്രങ്ങളില്‍ നിന്നുള്‍പ്പെടെ കൊവിഡുമായി ബന്ധപ്പെട്ട് ലഭ്യമാകുന്ന വിവരങ്ങള്‍ ആശങ്കാപരമാണ്. ഈ രാജ്യങ്ങളില്‍ ചികിത്സക്കു വേണ്ട പരമാവധി സൗകര്യങ്ങള്‍ ഒരുക്കാനും സ്വദേശി - വിദേശി വ്യത്യാസമില്ലാതെ ഒരേ പരിഗണന നല്‍കാനും ശ്രമിക്കുന്നുണ്ടെങ്കിലും സാമൂഹ്യ വ്യാപനത്തിലേക്ക് കാര്യങ്ങളെത്തിയാല്‍ ബന്ധപ്പെട്ട ഭരണാധികാരികളുടെ കൈപിടിയില്‍ നിന്ന് വഴുതി മാറാനിടയുണ്ട്. മുന്‍കൂട്ടി ഇക്കാര്യം കണ്ട് ആവശ്യമായ മുന്നൊരുക്കങ്ങള്‍ കേന്ദ്ര-സംസ്ഥാന സര്‍ക്കാരുകളുടെ നേതൃത്വത്തില്‍  ചെയ്യാനുള്ള നടപടികള്‍ ഉണ്ടാവണം. 

രോഗം പിടിപെട്ടവരും ഒന്നിച്ചു താമസിച്ചതു വഴി രോഗം പകരാന്‍ സാധ്യതയുള്ളവരുമായവരെ കണ്ടെത്തി അതാത് രാജ്യങ്ങളില്‍ തന്നെ കേന്ദ്ര-സംസ്ഥാന സര്‍ക്കാരുകളുടെ മേല്‍നോട്ടത്തില്‍ ക്വാറന്റൈന്‍ സംവിധാനം  ഒരുക്കാനുള്ള സാധ്യത ഉടന്‍ ആലോചനക്ക് വിധേയമാക്കണമെന്നും സമസ്ത ആവശ്യപ്പെട്ടിട്ടുണ്ട്

. 

രോഗികള്‍, ഗര്‍ഭിണികള്‍, വിസയുടെ കാലാവധി കഴിഞ്ഞവര്‍, തൊഴില്‍ നഷ്ടപ്പെട്ടവര്‍ തുടങ്ങി അത്യാവശ്യക്കാരെ നാട്ടില്‍ എത്തിക്കാനുള്ള അടിയന്തിര നടപടികളുണ്ടാവണമെന്നും നേതാക്കള്‍ ആവശ്യപ്പെട്ടു. 

ലോക്ക് ഡൗണിനു മുമ്പെ വീട്ടിലെത്താന്‍ കഴിയാതെ മറ്റു സംസ്ഥാനങ്ങളില്‍ കുടുങ്ങിക്കിടക്കുന്ന വിദ്യാര്‍ഥികളുള്‍പെടെയുള്ള മുഴുവന്‍ ആളുകളെയും വീടുകളിലെത്തിക്കാനുള്ള നടപടികള്‍ ഉണ്ടാവണമെന്നും നിവേദനത്തില്‍ ആവശ്യപ്പെട്ടു. വിദേശ രാജ്യങ്ങളിലെ  സംഘടനാ നേതാക്കളെയും വ്യവസായ - രാഷ്ട്രീയ പ്രമുഖരെയും പങ്കെടുപ്പിച്ചു കൊണ്ട് സമസ്ത നേതാക്കള്‍ നടത്തിയ വീഡിയോ കോണ്‍ഫ്രന്‍സിന്റെ ഭാഗമായാണ് നിവേദനം സമര്‍പ്പിച്ചിട്ടുള്ളത്. കൊവിഡ് 19നെ പ്രതിരോധിക്കുന്നതില്‍ ഗള്‍ഫ് രാഷ്ട്രങ്ങളും കേന്ദ്ര-സംസ്ഥാന സര്‍ക്കാരുകളും നടത്തുന്ന പോരാട്ടത്തില്‍ യോഗം സന്തുഷ്ടി രേഖപ്പെടുത്തുകയും അഭിനന്ദിക്കുകയും ചെയ്തു. 

 

കൊവിഡ് 19ന്റെ പശ്ചാത്തലത്തില്‍ ദുരിതമനുഭവിക്കുന്ന നാട്ടിലുള്ള പ്രവാസി കുടുംബങ്ങളെ സഹായിക്കുന്നതിനുള്ള പദ്ധതിക്ക് സമസ്ത രൂപം നല്‍കും. സഹായത്തിന് അര്‍ഹരായവരെ കണ്ടെത്തുന്നതിന് സമസ്തയുടെ പ്രവാസി സംഘടനകളെ  ചുമതലപ്പെടുത്തും. 

സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍, വൈസ് പ്രസിഡന്റ് പാണക്കാട് സയ്യിദ് ഹൈദരലി ശിഹാബ് തങ്ങള്‍, ജനറല്‍ സെക്രട്ടറി പ്രൊഫ. കെ ആലിക്കുട്ടി മുസ്‌ലിയാര്‍ എന്നിവര്‍ നേതൃത്വം നല്‍കി. 

 

കീഴ്ഘടകങ്ങളുടെ നേതാക്കളായ സയ്യിദ് മുഹമ്മദ് കോയ തങ്ങള്‍ ജമലുല്ലൈലി, അബ്ദുല്‍ ഹമീദ് ഫൈസി അമ്പലക്കടവ്, കെ. മോയിന്‍കുട്ടി മാസ്റ്റര്‍, മുസ്തഫ മുണ്ടുപാറ, ഓണംപിള്ളി മുഹമ്മദ് ഫൈസി, സത്താര്‍ പന്തലൂര്‍, ബശീര്‍ ഫൈസി ദേശമംഗലം, സി.പി ഇഖ്ബാല്‍ എന്നിവര്‍ വിവിധയിടങ്ങളില്‍ നിന്ന് വീഡിയോ കോണ്‍ഫറന്‍സില്‍ സംബന്ധിച്ചു. വിവിധ വിദേശ രാജ്യങ്ങളെ പ്രതിനിധീകരിച്ച് അബ്ദുസ്സലാം ബാഖവി, സയ്യിദ് ശുഐബ് തങ്ങള്‍, സൈനുല്‍ ആബിദ് (സഫാരി ഗ്രൂപ്പ്), മൂസ ഹാജി (ഫാതിമ ഗ്രൂപ്പ്), സിദ്ദീഖ് (നെസ്റ്റോ), ജബ്ബാര്‍ ഹാജി (ഹോട്ട് പാക് ) ശംസുദ്ദീന്‍ (നെല്ലറ) എം.എല്‍ മുസ്തഫ ഉസ്മാന്‍, കബീര്‍ പന്നിത്തടം (ടെല്‍ കോണ്‍), ഹംസ മാടക്കര (നാഷണല്‍), സുലൈമാന്‍ (യുനിക് വേള്‍ഡ് ) കരീം ഹാജി അബുദാബി, ശിയാസ് സുല്‍ത്താന്‍, ഹുസൈന്‍ ദാരിമി, റസാഖ് വളാഞ്ചേരി (യു.എ.ഇ), എ.വി അബൂബക്കര്‍ ഖാസിമി, ഫൈസല്‍ ഹുദവി, നിയാസ് ഹുദവി, ഇസ്മാഈല്‍ ഹുദവി (ഖത്തര്‍), സയ്യിദ് ഉബൈദുല്ല തങ്ങള്‍, അലവിക്കുട്ടി ഒളവട്ടൂര്‍ (സഊദി അറേബ്യ), സയ്യിദ് ഫഖ്‌റുദ്ദീന്‍ തങ്ങള്‍, കുഞ്ഞിമുഹമ്മദ് ഹാജി (ബഹ്‌റൈന്‍), ശംസുദ്ദീന്‍ ഫൈസി, അബ്ദുല്‍ ഗഫൂര്‍ ഫൈസി, റഫീഖ് (മാംഗോ ഗ്രൂപ്പ്), അബ്ദുല്‍ ഖാലിക് കഫബ (കുവൈത്ത്), സെയ്ദു ഹാജി പൊന്നാനി (മസ്‌കത് ) എന്നിവര്‍ പങ്കെടുത്തു.