ന്യൂഡല്‍ഹി: ഗുജറാത്തിലെ ഒരു ആശുപത്രിയില്‍ കൊവിഡ് രോഗികള്‍ക്ക് മതംതിരിച്ച് വാര്‍ഡുകള്‍ നല്‍കിയെന്ന വാര്‍ത്തയുടെ പശ്ചാത്തലത്തില്‍ ഇന്ത്യയെ വിമര്‍ശിച്ച അന്താരാഷ്ട്ര മതസ്വാതന്ത്ര്യത്തിനായുള്ള യു.എസ് കമ്മിഷനെതിരേ ഇന്ത്യ. അഹമ്മദാബാദിലെ സിവില്‍ ആശുപത്രിയില്‍ ഒരു പ്രത്യേക മതവിഭാഗക്കാരെ പേരുവിളിച്ച് മറ്റൊരു വാര്‍ഡിലേക്ക് മാറ്റിയെന്ന് ആശുപത്രി സൂപ്രണ്ടിനെ ഉദ്ധരിച്ച് ഇന്ത്യന്‍ എക്‌സ്പ്രസ് റിപ്പോര്‍ട്ട് ചെയ്തിരുന്നു. എന്നാല്‍ ആരോഗ്യ മന്ത്രാലയം ഇത് നിഷേധിക്കുകയും ചെയ്തു. 

സംഭവത്തില്‍ ആശങ്ക പ്രകടിപ്പിച്ച യു.എസ് കമ്മിഷന്‍ രാജ്യത്ത് മുസ്‌ലിംകള്‍ നേരിടുന്ന വിവേചനം വര്‍ധിപ്പിക്കാനേ ഇത്തരം സംഭവങ്ങള്‍ ഉപകരിക്കൂവെന്നും മുസ്‌ലിംകളാണ് കൊവിഡ് പരത്തുന്നതെന്ന തെറ്റായ അഭ്യൂഹത്തെ ഇത് ബലപ്പെടുത്തുകയേയുള്ളൂവെന്നും ചൂണ്ടിക്കാട്ടി. അതേസമയം കൊവിഡിനെതിരായ ഇന്ത്യയുടെ പോരാട്ടത്തിന് വര്‍ഗീയനിറം നല്‍കുന്നതാണ് യു.എസ് കമ്മിഷന്റെ പ്രസ്താവനയെന്ന് വിദേശകാര്യമന്ത്രാലയ വക്താവ് അനുരാഗ് ശ്രീവാസ്തവ പറഞ്ഞു. നേരത്തെ പൗരത്വനിയമ ഭേദഗതി വിഷയത്തിലും അന്താരാഷ്ട്ര മതസ്വാതന്ത്ര്യത്തിനായുള്ള യു.എസ് കമ്മിഷന്‍ കേന്ദ്ര സര്‍ക്കാരിനെ രൂക്ഷമായി വിമര്‍ശിച്ചിരുന്നു.