മുംബൈ: മുംബൈ ഫോര്‍ട്ട് ഏരിയയിലെ പട്ടേല്‍ ചേംബറില്‍ വന്‍ തീപിടുത്തം. ഇന്നലെ രാവിലെ 4.30ഓടെയാണ് കെട്ടിടത്തിന്റെ ഒരു ഭാഗത്ത് തീപിടുത്തമുണ്ടായത്. സംഭവത്തില്‍ ആളപായമില്ല. തീയണക്കുന്നതിനിടെ രണ്ട് അഗ്‌നിരക്ഷാ ഉദ്യോഗസ്ഥര്‍ക്ക് പരുക്കേറ്റു.കെട്ടിടത്തിന്റെ മൂന്നാം നിലയിലാണ് ആദ്യം തീ കണ്ടത്. പിന്നീട് നാലിലേക്കും വ്യാപിക്കുകയായിരുന്നു. പതിനാറോളം ഫയര്‍ എഞ്ചിനുകള്‍ സ്ഥലത്തെത്തിയാണ് തീയണച്ചത്. തീപിടുത്തമുണ്ടായ കെട്ടിടം നാല് വര്‍ഷമായി ഉപയോഗശൂന്യമാണ്. അതേസമയം തീപിടുത്തത്തിനുള്ള കാരണം ഇതുവരെ വ്യക്തമായിട്ടില്ല. ഇത് പരിശോധിച്ച് വരു കയാണെന്ന് അധികൃതര്‍ വ്യക്തമാക്കി.
പത്ത് ദിവസത്തിനുള്ളില്‍ മേഖലയില്‍ ഇത് രണ്ടാം തവണയാണ് തീപിടുത്തമുണ്ടാകുന്നത്. സൗത്ത് മുംബൈയിലെ ആദായനികുതി ഓഫിസായ സ്‌കൈ ഇന്ത്യയില്‍ കഴിഞ്ഞ വെള്ളിയാഴ്ച തീപിടുത്തമുണ്ടായിരുന്നു.ആളുകള്‍ കെട്ടിടത്തിനകത്ത് കുടുങ്ങിപോയെങ്കിലും എല്ലാവരേയും പരുക്കൊന്നും കൂടാതെ രക്ഷാപ്രവര്‍ത്തകര്‍ പുറത്തെത്തിക്കുകയായിരുന്നു.