പെരുമാട്ടി: പെരുമാട്ടി പഞ്ചായത്തില്‍ ഇത്തവണ പയര്‍കൃഷി വ്യാപകമാക്കുന്നു. വി.എഫ്.പി.സി.കെയും കൃഷിവകുപ്പും നടപ്പിലാക്കുന്ന പദ്ധതികളുടെ ഭാഗമായിട്ടാണ് പയര്‍കൃഷി ഇത്തവണ വര്‍ദ്ധിപ്പിച്ചിട്ടുള്ളത്. വണ്ടിത്താവളം, കന്നിമാരി, മീനാക്ഷിപുരം എന്നീ പ്രദേശങ്ങളില്‍ പയര്‍ വിത്തിറക്കിയ പാടങ്ങളില്‍ പന്തല്‍ നിര്‍മ്മിക്കുന്നതിനുള്ള പണിപുരയിലാണ് പച്ചക്കറി കര്‍ഷകര്‍. പയര്‍കൃഷിക്കിടെ തക്കാളി കൃഷിയും ഇത്തവണ പരീക്ഷിക്കുന്നുണ്ട്. പട്ടഞ്ചേരി, പെരുമാട്ടി പ്രദേശങ്ങളെയാണ് കൂടുതലായി പയര്‍കൃഷിക്ക് പര്യാപതമാക്കീട്ടുള്ളത്. കൂടുതല്‍ രാസകീടനാശിനി ഉപയോഗിക്കാതെ കാലിവളവും ജൈവവളങ്ങളും ഉപയോഗിച്ചുള്ള പരീക്ഷണ പയര്‍കൃഷി ഇത്തവണ വിജയിച്ചാല്‍ കാര്‍ഷിക സര്‍വകലാശായുടെ സഹായത്തോടെ വിസ്തൃതി വ്യാപിപ്പിക്കുമെന്ന് പയര്‍ കര്‍ഷകനായ മുരുകവേല്‍ പറഞ്ഞു.