വണ്ടൂര്‍: പള്ളിക്കുന്നില്‍ നിയന്ത്രണം വിട്ട ലോറി വൈദ്യുതിത്തൂണിലിടിച്ച് അപകടം. സംഭവ സമയത്ത് വൈദ്യുതിയില്ലാത്തതിനാല്‍ വന്‍ ദുരന്തം ഒഴിവായി. പട്ടിക്കാട് വടപുറം സംസ്ഥാനപാതയില്‍ പള്ളിക്കുന്ന് ജുമാ മസ്ജിദിന് മുന്‍പില്‍ ഞായറാഴ്ച പുലര്‍ച്ചെയായിരുന്നു അപകടം.
പെരിന്തല്‍മണ്ണ ഭാഗത്ത്‌നിന്ന് നിലമ്പൂര്‍ ഭാഗത്തേക്ക് പോകുകയായിരുന്ന ലോറിയാണ് അപകടത്തില്‍പ്പെട്ടത്. ഇരുമ്പുതൂണില്‍ ഇടിച്ച ശേഷം അഞ്ച് മീറ്ററോളം നിരങ്ങിയാണ് വാഹനം നിന്നത്. വാഹനത്തിന്റെ മുന്‍ഭാഗം തകര്‍ന്നിട്ടുണ്ട്. ഡ്രൈവറടക്കം വാഹനത്തിലുണ്ടായിരുന്ന രണ്ടുപേരും പരുക്കില്ലാതെ രക്ഷപ്പെട്ടു. സമീപത്തെ പഴക്കടയും സ്വകാര്യ മൊബൈല്‍ കമ്പനിയുടെ ഒപ്റ്റിക് ഫൈബറുകളും തകര്‍ന്നു. കെ.എസ്.ഇ.ബി ജീവനക്കാര്‍ ഒരു പകല്‍ മുഴുവന്‍ പരിശ്രമിച്ചാണ് വൈദ്യുതിവിതരണം പുനഃസ്ഥാപിച്ചത്.