ജിദ്ദ:സഊദിയിൽ രാജ്യവ്യാപകമായി ഏകീകൃത കർഫ്യൂ പാസ് പ്രാബല്യത്തിലായി.ഇന്ന് മുതൽ ആഭ്യന്തര മന്ത്രാലയത്തിന്‍റെ പ്രത്യേക സീൽ പതിപ്പിച്ച പാസുകൾ ഉള്ളവർക്ക് മാത്രമേ കർഫ്യൂ സമയങ്ങളിൽ യാത്ര ചെയ്യുവാൻ അനുവാദമുള്ളൂ. കോവിഡ് വ്യാപനം തടയുന്നതിന്‍റെ ഭാഗമായാണ് നടപടി.വാഹനം ഒഴിവാക്കാൻ പറ്റാത്ത പ്രത്യേക ജോലികളിലും അടക്കം പുറത്ത് പോകുന്നവർക്ക് ആവശ്യമായ പാസ് ഏകികൃത രൂപത്തിലാക്കി നേരത്തെ മക്കയിലും റിയാദിലും മദീനയിലും നടപ്പാക്കിയിരുന്നു.

ഇതിനു പിന്നാലെയാണ് രാജ്യത്താകമാനം ഇത് നടപ്പിൽ വരുത്തി ആഭ്യന്തര മന്ത്രാലയവും ഉത്തരവിറക്കിയത്. കര്‍ഫ്യൂവില്‍ നിന്ന് ഇളവ് ലഭിക്കുന്ന സ്ഥാപനങ്ങളിലെ ജീവനക്കാര്‍ക്ക് മാത്രമേ ഏകീകൃത പാസ് അനുവദിക്കുകയുള്ളൂ. അതത് സ്ഥാപനങ്ങളുമായി ബന്ധപ്പെട്ട സര്‍ക്കാര്‍ വകുപ്പുകളുടെ വെബ്‌സൈറ്റില്‍ നിന്നാണ് പാസ് ഇഷ്യു ചെയ്യേണ്ടതെന്നും മന്ത്രാലയം അറിയിച്ചു.നിലവിൽ മുഴുസമയ കർഫ്യൂ പ്രഖ്യാപിച്ച സ്ഥലങ്ങളിൽ എല്ലാ സമയവും വാഹനത്തില്‍ പുറത്തിറങ്ങാന്‍ പാസ് നിർബന്ധമാണ്. എന്നാൽ മൂന്ന് മണിമുതൽ മാത്രം കർഫ്യൂ പ്രഖ്യാപിച്ചിരിക്കുന്ന സ്ഥലങ്ങളിൽ മൂന്ന് മണിമുതൽ മാത്രമേ പാസ് ആവശ്യമായി വരൂ. കർഫ്യൂ സമയങ്ങളിൽ വാനങ്ങളിൽ യാത്ര ചെയ്യുന്നതിനും, വാഹനമോടിക്കുന്നതിനും പുതിയ പാസ് ഉള്ളവർക്ക് മാത്രമേ അനുമതിയുള്ളൂ.

നിലവിൽ മുഴുസമയ കർഫ്യൂ പ്രഖ്യാപിച്ച സ്ഥലങ്ങളിലും, രാവിലെ ആറ് മുതൽ വൈകിട്ട് മൂന്ന് വരെ അവശ്യ സാധനങ്ങൾ വാങ്ങുന്നതിനായി തൊട്ടടുത്ത കടകളിലേക്ക് പോകുവാൻ അനുവാദമുണ്ട്. എന്നാൽ ഇവിടങ്ങളിലുള്ളവർ വാഹനങ്ങളിൽ യാത്ര ചെയ്യുവാൻ എല്ലാ സമയങ്ങളിലും പാസ് ഉപയോഗിക്കണം. സാധനങ്ങൾ വാങ്ങി കഴിഞ്ഞവർ വേഗത്തിൽ വീടുകളിലെത്തണമെന്നാണ് ചട്ടം.

അനാവശ്യമായി പുറത്ത് കറങ്ങി നടക്കുന്നതും, കൂടുതൽ സമയം പുറത്ത് അകാരണമായി ചെലവഴിക്കുന്നതും പിഴ ചുമത്തപ്പെടുത്ത കുറ്റമാണ്. മതിയായ രേഖകള്‍ സഹിതം കമ്പനി മുഖേന ഓണ് ലൈനിൽ പാസിനായി അപേക്ഷിക്കാം. വ്യാജ പാസ് നിർമ്മിക്കുന്നവർക്ക് അഞ്ച് വർഷം വരെ തടവും അഞ്ച് ലക്ഷം റിയാൽ വരെ പിഴയും ചുമത്തും. പാസില്ലാതെ വാഹനത്തില്‍ യാത്ര ചെയ്ത് പിടിക്കപ്പെട്ടാല്‍ പതിനായിരം റിയാലാണ് ആദ്യ ഘട്ടത്തിൽ പിഴ ചുമത്തുക.

അതേ സമയം റമദാന്‍ മാസത്തില്‍ കര്‍ഫ്യൂ ഇളവ് ഉപയോഗപ്പെടുത്തി പുറത്തിറങ്ങാനുള്ള സമയം ആഭ്യന്തര മന്ത്രാലയം മാറ്റി. റമദാന്‍ വ്രതാരംഭം മുതല്‍ രാവിലെ 9 മുതല്‍ അഞ്ച് വരെ മാത്രമായിരിക്കും പുറത്തിറങ്ങാനുള്ള സമയം.