കയ്പമംഗലം(തൃശൂര്‍): മാരക ലഹരിമരുന്നായ കൊക്കൈനുമായി ആറംഗ സംഘത്തെ കയ്പമംഗലം പൊലിസ് അറസ്റ്റ് ചെയ്തു. കയ്പമംഗലം ദേവമംഗലം കുടിലിങ്ങല്‍ സന്ദേശ് (19), മൂന്നുപീടിക ബീച്ച് കടവില്‍ വീട്ടില്‍ മുഹമ്മദ് ഫസല്‍(20), ചളിങ്ങാട് സ്വദേശികളായ കോനത്ത് വീട്ടില്‍ അദ്‌നാന്‍ (20), മുടവന്‍കാട്ടില്‍ നാദിര്‍ഷ(19), മതിലകം സ്വദേശികളായ തറയില്‍ വിഷ്ണു(21), വെളിയത്ത് വീട്ടില്‍ അഖില്‍(21) എന്നിവരെയാണ് എസ്.ഐ കെ.എസ് സുബിന്ദും സംഘവും അറസ്റ്റ് ചെയ്തത്. ഇവരില്‍ നിന്ന് വില്‍പനക്കായി എത്തിച്ച 60 മില്ലിഗ്രാം കൊക്കൈനും കണ്ടെടുത്തു. രഹസ്യവിവരത്തെ തുടര്‍ന്ന് നടത്തിയ അന്വേഷണത്തിലാണ് വഴിയമ്പലത്ത് വച്ച് പ്രതികള്‍ പിടിയിലായത്. അര ഗ്രാം കൊക്കൈന് 2,500 രൂപയാണ് വില. എറണാകുളത്ത് നിന്നാണ് മയക്കുമരുന്ന് കൊണ്ട് വരുന്നതെന്ന് പ്രതികള്‍ പൊലിസിന് മൊഴി നല്‍കി.പിടിയിലായവര്‍ കഞ്ചാവ് , ഹഷീഷ്,എം.ഡി.എം.എ തുടങ്ങിയവയും ഉപയോഗിക്കുന്നവരാണെന്ന് പൊലിസ് പറഞ്ഞു.
തീരദേശ മേഖലയില്‍ വിവിധയിടങ്ങളില്‍ ലഹരി മരുന്നുകള്‍ വിതരണം ചെയ്തതായും പ്രതികള്‍ അന്വേഷണ സംഘത്തോട് വെളിപ്പെടുത്തി. പിടിയിലായവരുടെ മൊബൈല്‍ ഫോണില്‍ നിന്ന് സ്ഥിരമായി ലഹരിമരുന്ന് ഉപയോഗിക്കുന്നവരുടെ പേരു വിവരങ്ങള്‍ പൊലിസ് ശേഖരിച്ചിട്ടുണ്ട്.
ഗൂഗിള്‍ പേ വഴിയാണ് കൊക്കൈനിന്റെ പണം കൈമാറുന്നത്. എ.എസ്.ഐമാരായ അബ്ദുല്‍ സത്താര്‍, കെ.എസ് അബ്ദുല്‍ സലാം, എ.സജിബാല്‍, സി.കെ ഷാജു, സീനിയര്‍ സി.പി.ഒ മാരായ പി.എ അഭിലാഷ്, പി.ബി നജീബ്, ലാല്‍ജി, പ്രബിന്‍, സി.പി.ഒ മാരായ കിരണ്‍, ഹബീബ്, ജോജോ എന്നിവരും അന്വേഷണ സംഘത്തിലുണ്ടായിരുന്നു.