തിരുവനന്തപുരം: സംസ്ഥാന സര്‍ക്കാര്‍ രൂപീകരിച്ച സന്നദ്ധസേനയിലേക്കുള്ള വോളണ്ടിയര്‍ രജിസ്‌ട്രേഷന്‍ മൂന്നു ലക്ഷം പിന്നിട്ടു. നിലവില്‍ 3,25,785 വോളണ്ടിയര്‍മാര്‍ സാമൂഹിക സന്നദ്ധസേനയില്‍ രജിസ്‌ട്രേഷന്‍ പൂര്‍ത്തിയാക്കി. ഇതില്‍ 2,61,785 പുരുഷന്മാരും, 63,947 സ്ത്രീകളും, 53 ഭിന്നലിംഗക്കാരും ഉള്‍പ്പെടുന്നു.
ഇതുവരെ രജിസ്റ്റര്‍ ചെയ്തവരില്‍ 2,53,674 പേര്‍ 20നും 40നും ഇടയില്‍ പ്രായമുള്ളവരാണ്.
നിലവില്‍ 25,434 കുടുംബശ്രീപ്രവര്‍ത്തകരും, യുവജന കമ്മിഷന്റെ ഭാഗമായ 11,340 അംഗങ്ങളും, 10,150 എന്‍.എസ്.എസ് വോളണ്ടിയര്‍മാരും, യുവജനക്ഷേമ ബോര്‍ഡില്‍ നിന്നുമുള്ള 6,325 അംഗങ്ങളും, 5,250 എന്‍.സി.സി കേഡറ്റുകളും, 3,422 എക്‌സ് എന്‍.സി.സി കേഡറ്റുകളും സന്നദ്ധസേനയുടെ ഭാഗമായിട്ടുണ്ട്.
കൊവിഡ് പ്രതിരോധ പ്രവര്‍
ത്തനങ്ങള്‍ക്കായി മാത്രം ഇതിനോടകം 36,000 സന്നദ്ധസേന വോളണ്ടിയര്‍മാരെ നിയോഗിച്ചിട്ടുണ്ട്. വിവര സാങ്കേതിക മേഖലയില്‍ പ്രവര്‍ത്തിക്കുന്നവര്‍, ആരോഗ്യപ്രവര്‍ത്തകര്‍, എന്‍ജിനീയര്‍മാര്‍, കായികതാരങ്ങള്‍, ഓട്ടോറിക്ഷ ഡ്രൈവര്‍മാര്‍, വിദ്യാര്‍ഥികള്‍ തുടങ്ങി സമൂഹത്തിലെ വിവിധ മേഖലകളിലുള്ളവര്‍ സന്നദ്ധസേനയുടെ ഭാഗമായി പ്രവര്‍ത്തിക്കുന്നുണ്ട്. മരുന്നു വിതരണം, അവശ്യസാധനങ്ങളുടെ ഹോം ഡെലിവറി, സാമൂഹ അടുക്കള, രക്തദാനം, വിത്തു വിതരണം ഉള്‍പ്പടെയുള്ള മേഖലകളിലാണ് നിലവില്‍ ഇവര്‍ പ്രവര്‍ത്തിച്ചുവരുന്നത്.
സംസ്ഥാനത്ത് 100 പേര്‍ക്ക് ഒരു വോളണ്ടിയര്‍ എന്ന തോതില്‍ 3.4 ലക്ഷം സന്നദ്ധസേന വോളണ്ടിയര്‍മാരുടെ അംഗത്വമാണ് സര്‍ക്കാര്‍ ലക്ഷ്യമിടുന്നത്. മത്സ്യത്തൊഴിലാളികള്‍, ഡ്രൈവര്‍മാര്‍, ആരോഗ്യപ്രവര്‍ത്തകര്‍ തുടങ്ങിയവര്‍ക്ക് പ്രത്യേക പരിശീലനം നല്‍കുമെന്ന് സാമൂഹിക സന്നദ്ധസേന ഡയരക്ടര്‍ അമിത് മീണ അറിയിച്ചു. ഫയര്‍ ആന്റ് സേഫ്റ്റി, കേരളാ പൊലിസ്, വനം, ദുരന്ത നിവാരണം തുടങ്ങിയ വിവിധ വകുപ്പുകളില്‍നിന്നു എഴുന്നൂറോളം മാസ്റ്റര്‍ ട്രെയിനര്‍മാരാകും പരിശീലന പരിപാടികള്‍ക്ക് നേതൃത്വം നല്‍കുക. ജില്ലാതലത്തില്‍ ആയിരിക്കും സാമൂഹിക സന്നദ്ധസേന വോളണ്ടിയര്‍മാര്‍ക്ക് പരിശീലനം ലഭ്യമാക്കുക.