മുംബൈ:  ബാറ്റു മാത്രമല്ല പാട്ടും തനിക്ക് വഴങ്ങുമെന്ന് തെളിയിച്ച് ഇന്ത്യന്‍ ക്രിക്കറ്റ് ഇതിഹാസം സച്ചിന്‍ ടെണ്ടുല്‍ക്കര്‍.
ഗാനാലാപനത്തില്‍ ഒരു കൈ നോക്കിയിരിക്കുകയാണ് ഇന്ത്യയുടെ മാസ്റ്റര്‍ ബ്ലാസ്റ്റര്‍. പ്രശസ്ത ഗായകന്‍ സോനു നിഗത്തിനൊപ്പം ക്രിക്കറ്റ് വാലി ബീറ്റ് എന്നു തുടങ്ങുന്ന ഗാനമാണ് സച്ചിന്‍ ആലപിച്ചിരിക്കുന്നത്.

ഇന്ത്യന്‍ ഐഡല്‍ 9 എന്ന സംഗീത പരിപാടിയുടെ ഗ്രാന്റ് ഫിനാലെയില്‍ ലോഞ്ച് ചെയ്ത ഗാനത്തിന്റെ പൂര്‍ണരൂപം 100എം.ബി ആപ്പില്‍ ലഭ്യമാവും.

യൂട്യൂബിലൂടെ പുറത്തുവന്ന സച്ചിന്റെ പാട്ടിന്റെ ഭാഗം ഇതിനോടകം വൈറലായി കഴിഞ്ഞു. പുതുമുഖത്തിന്റെ ജാള്യതയോ പതറിച്ചയോയില്ലാതെ അനായാസമാണ് സച്ചിന്റെ പാട്ട്.

നല്ലൊരു ഗായകന്‍ കൂടിയാണ് സച്ചിനെന്ന് സോനു നിഗം പറയുന്നു. സച്ചിന്റെ പുതിയ ഇന്നിങ്‌സില്‍ പങ്കാളിയാകാന്‍ കഴിഞ്ഞത് തന്റെ ഭാഗ്യമാണെന്നും സോനു കൂട്ടിച്ചേര്‍ത്തു.