ലഖ്‌നോ: തെരഞ്ഞെടുപ്പ് വാഗ്ദാനം പാലിക്കാത്ത പ്രധാനമന്ത്രി നരേന്ദ്രമോദി വിശ്വസിക്കാന്‍ കൊള്ളാത്തവനും വഞ്ചകനുമാണെന്ന് മുതിര്‍ന്ന അഭിഭാഷകനും ആര്‍.ജെ.ഡി എം.പിയുമായ രാംജെഠ് മലാനി.
വിദേശത്തെ കള്ളപ്പണ നിക്ഷേപം രാജ്യത്ത് തിരികെയെത്തിക്കുമെന്നായിരുന്നു തെരഞ്ഞെടുപ്പിനു മുന്‍പുള്ള വാഗ്ദാനം. അധികാരത്തിലേറി വര്‍ഷങ്ങള്‍ കഴിഞ്ഞിട്ടും പ്രധാനമന്ത്രി വാഗ്ദാനം പാലിക്കാത്തത് മോദിയെ വിശ്വസിക്കാന്‍ കൊള്ളില്ലെന്ന വസ്തുതയിലേക്കാണ് വിരല്‍ചൂണ്ടുന്നതെന്നും അദ്ദേഹം ആരോപിച്ചു. വാഗ്ദാനം പാലിക്കാന്‍ കഴിയാത്ത അദേഹം പൂര്‍ണ പരാജയമാണെന്നും രാംജെഠ് മലാനി കുറ്റപ്പെടുത്തി. ഉത്തര്‍പ്രദേശ് തലസ്ഥാനമായ ലഖ്‌നോവില്‍ സമാജ്‌വാദി സിദ്ധിസഭയുടെ സമ്മേളനത്തില്‍ സംസാരിക്കുമ്പോഴാണു രാംജെഠ്മലാനി പ്രധാനമന്ത്രിക്കെതിരേ ആഞ്ഞടിച്ചത്.
പ്രധാനമന്ത്രിയായ ശേഷം തെരഞ്ഞെടുപ്പ് വാഗ്ദാനങ്ങള്‍ പൂര്‍ണമായും അദേഹം മറന്നിരിക്കുകയാണ്. നല്‍കിയ വാഗ്ദാനം പാലിക്കാന്‍ പോലും മോദിക്കു കഴിയില്ലെന്നു വിശ്വസിക്കേണ്ടിയിരിക്കുന്നു. മോദിയെ പ്രധാനമന്ത്രി സ്ഥാനത്തെത്തിക്കാന്‍ താനും പ്രയത്‌നിച്ചിട്ടുണ്ട്. മോദിയെ സഹായിച്ചു താന്‍ വഞ്ചിതനായെന്നും അതില്‍ കുറ്റബോധമുണ്ടെന്നും അദ്ദേഹം പറഞ്ഞു.
മോദിയെ വിശ്വസിക്കരുതെന്ന് ജനങ്ങളോടു പറഞ്ഞ അദ്ദേഹം ഉത്തര്‍പ്രദേശ് മുഖ്യമന്ത്രി അഖിലേഷ് യാദവിനെ പ്രശംസിക്കാനും മറന്നില്ല. ക്ലീന്‍ ഇമേജുള്ള അഖിലേഷ് ഭാവി വാഗ്ദാനമാണെന്നും അദ്ദേഹം അഭിപ്രായപ്പെട്ടു.