തളിപ്പറമ്പ്: സഹപാഠിയോട് സംസാരിച്ചതിന് കോളജ് വിദ്യാര്‍ഥിയിയെ മര്‍ദിച്ച സംഭവത്തില്‍ മൂന്നുപേരെ പൊലിസ് അറസ്റ്റുചെയ്തു. താഹ, മജീദ്, താഹ എന്നിവരെയാണു പൊലിസ് അറസ്റ്റുചെയ്തത്. തളിപ്പറമ്പ് സര്‍ സയ്യിദ് കോളജ് ഒന്നാംവര്‍ഷ ബി.എ ഹിസ്റ്ററി വിദ്യാര്‍ഥി ആലക്കോട് രയരോം വട്ടക്കയത്തെ ലാല്‍ജിത്ത് കെ സുരേഷിനാണ്(19) മര്‍ദനമേറ്റത്. വിദ്യാര്‍ഥിയെ തളിപ്പറമ്പ് സഹകരണ ആശുപത്രിയില്‍ പ്രവേശിപ്പിച്ചു. ചൊവ്വാഴ്ച വൈകുന്നേരമായിരുന്നു സംഭവം. മന്നയിലെ ബസ്‌സ്റ്റോപ്പില്‍ നില്‍ക്കുമ്പേള്‍ ഇവിടെയെത്തിയ സഹപാഠിയോട് സംസാരിച്ചു നില്‍ക്കുന്നതിനിടെ കാറില്‍ തട്ടിക്കൊണ്ടുപോയി മര്‍ദിച്ചുവെന്നാണു പരാതി. സഹപാഠികളാണെന്ന് പറഞ്ഞെങ്കിലും ബലമായി കാറില്‍ പിടിച്ചുകയറ്റി ലാല്‍ജിത്തിനെ അള്ളാംകുളത്തെ വിജനമായ ഗ്രൗണ്ടില്‍ എത്തിച്ച് മര്‍ദിച്ചുവെന്നു പരാതിയില്‍ പറയുന്നു.