കുന്ദമംഗലം: കുന്ദമംഗലം പഞ്ചായത്ത് ഓഫിസില്‍ കസേരയിലിരുന്ന 14ാം വാര്‍ഡ് മെംബര്‍ എം.വി ബൈജുവിനെ പഞ്ചായത്ത് ജൂനിയര്‍ സൂപ്രണ്ട് വി.എന്‍ അഷ്‌റഫ് അവഹേളിച്ചതായി പരാതി. കഴിഞ്ഞ ദിവസം പഞ്ചായത്ത് ഓഫിസില്‍ ഒരു സര്‍ട്ടിഫിക്കറ്റുമായി ബന്ധപ്പെട്ട് ഫ്രണ്ട് ഓഫിസിനടുത്ത ഒഴിഞ്ഞ കസേരയിലിരുന്നപ്പോള്‍ യാതൊരുപ്രകോപനവുമില്ലാതെ ജൂനിയര്‍ സൂപ്രണ്ട് തന്റെ കാബിനില്‍ നിന്ന് ഇറങ്ങി വന്ന് പഞ്ചായത്തംഗങ്ങളൊന്നും ഓഫിസിനകത്ത് ഇരിക്കരുതെന്നും എഴുന്നേറ്റ് ഇറങ്ങി പോ എന്നും ആക്രോശിക്കുകയുണ്ടായി.
നിരവധി ആവശ്യങ്ങള്‍ക്കായി ഓഫിസിലെത്തിയ ജനങ്ങളുടെ മുന്നില്‍ വച്ചാണ് ഇദ്ദേഹം ജനപ്രതിനിധിയായ ബൈജുവിനെ അപമാനിച്ചത്. പട്ടികജാതി സംവരണ മണ്ഡലമായ, പഞ്ചായത്ത് ഓഫിസ് സ്ഥിതി ചെയ്യുന്ന വാര്‍ഡിന്റെ മെംബര്‍ കൂടിയായ ബൈജു പഞ്ചായത്ത് പ്രസിഡന്റിനും പഞ്ചായത്ത് ഡെ. ഡയരക്ടര്‍ക്കും പരാതി നല്‍കിയിട്ടുണ്ട്. ഭരണ സമിതി യോഗത്തില്‍ ജൂനിയര്‍ സൂപ്രണ്ടിനെതിരേ വ്യാപകമായ പരാതിയാണ് അംഗങ്ങള്‍ ഉന്നയിച്ചത്. പഞ്ചായത്തിലെത്തുന്ന പൊതുജനങ്ങള്‍ക്ക് കൃത്യ സമയത്ത് സേവനങ്ങള്‍ നല്‍കാതിരിക്കുന്നതായി കക്ഷി രാഷ്ട്രീയ ഭേദമന്യേ ഇദ്ദേഹത്തിനെതിരേ പഞ്ചാായത്തംഗങ്ങള്‍ പരാതിപ്പെട്ടു.