തൊടുപുഴ: ശാസ്ത്രം വളര്‍ന്നിട്ടും ഉരുള്‍ പൊട്ടലിന്റെ യഥാര്‍ഥ കാരണം ഇന്നും അജ്ഞാതം. നിലയ്ക്കാതെ പെയ്യുന്ന മഴ മലയോര മേഖലകളില്‍ ഉരുള്‍പൊട്ടലിന്റെ രൂപത്തില്‍ സംഹാരതാണ്ഡവമാടുമ്പോഴും യാഥാര്‍ഥ കാരണത്തിനായി ശാസ്ത്രലോകം പോലും ഇരുട്ടില്‍ തപ്പുകയാണ്.

പ്രകൃതിയെ ചവിട്ടി മെതിക്കുന്നതിനുള്ള ശിക്ഷയായി ഉരുള്‍പൊട്ടലിനെ വ്യാഖ്യാനിക്കാം. എന്നാല്‍ മുന്‍കൂട്ടി അറിയാന്‍ ഐ.ടി യുഗത്തിലും സാധിച്ചിട്ടില്ലെന്നതാണ് വസ്തുത. യഥാര്‍ഥ കാരണവും നിഗൂഢമാണ്. പ്രകൃതിയുടെ ഈ പ്രതിഭാസം മുന്‍കൂട്ടി അറിയാനുള്ള ഒരുപകരണം ആറ് വര്‍ഷം മുന്‍പ് മൂന്നാറില്‍ സ്ഥാപിച്ചിരുന്നു. എന്നാല്‍ ഉപകരണത്തിന്റെ കാര്യക്ഷമത ഇതുവരെ അധികൃതര്‍ ബോധ്യപ്പെടുത്തിയിട്ടില്ല. പല മുഖങ്ങളിലേക്കാണ് ശാസ്ത്രലോകം വിരല്‍ ചൂണ്ടുന്നത്. അഗ്നിപര്‍വതം പോലെ ഭൂഗര്‍ഭത്തില്‍ നിന്നു പൊട്ടുന്നതല്ല ഉരുള്‍. മലയുടെ ഉച്ചിയിലോ അടിയിലോ അടിവാരത്തോ, തുറസ്സായിക്കിടക്കുന്ന സ്ഥലത്തോ ഉരുള്‍പൊട്ടല്‍ സംഭവിക്കാം. ദുരന്തമുണ്ടായ സ്ഥലങ്ങളില്‍ 30-40 അടി ആഴമുള്ള ഗര്‍ത്തങ്ങള്‍ പ്രത്യക്ഷപ്പെടാറുണ്ട്. അതാതു സ്ഥലത്തെ മണ്ണും അന്തരീക്ഷത്തിലെ ജലസാന്ദ്രതയും അനുസരിച്ചാണ് ഗര്‍ത്തത്തിന്റെ ആഴം.

സംസ്ഥാനത്ത് 5607 ച.കി.മീ. പ്രദേശത്ത് ഉരുള്‍പൊട്ടല്‍ സാധ്യതയുണ്ടെന്നാണു ആസൂത്രണ രേഖയില്‍ പറയുന്നത്. കേരളത്തിന്റെ മൊത്തം വിസ്തൃതിയുടെ 14.4 ശതമാനം വരും ഇത്. ഏതു നിമിഷവും ഉരുള്‍ പൊട്ടാനുള്ള സാധ്യതയുമായി പത്ത് താലൂക്കുകളുമുണ്ട്. ഇതിനു പുറമേ മിതസാധ്യതാ പട്ടികയില്‍ 25 താലൂക്കുകളും. ഇടുക്കിയിലും പാലക്കാട്ടുമാണ് അപകടസാധ്യത ഏറെ. പട്ടികയില്‍പ്പെട്ട പലയിടത്തും ഇപ്പോള്‍ത്തന്നെ ഉരുള്‍പൊട്ടലുണ്ടായിക്കഴിഞ്ഞു. സമുദ്രനിരപ്പില്‍ നിന്ന് 1500-1700 മീറ്റര്‍ ഉയരമുള്ള മേഖലയില്‍ ഉരുള്‍ പൊട്ടലിനും മണ്ണിടിച്ചിലിനും സാധ്യതയുണ്ടെന്ന് ഭൗമശാസ്ത്ര പഠന കേന്ദ്രത്തിന്റെ (സെസ്) മുന്നറിയിപ്പ് നിലവിലുണ്ട്. കണ്ണൂര്‍ മുതല്‍ തിരുവനന്തപുരം വരെ 1500 ചതുരശ്ര കിലോമീറ്റര്‍ സ്ഥലത്താണ് ഇതിന് സാധ്യതയുള്ളതായി സെസ് കണ്ടെത്തിയിരിക്കുന്നത്.