കോതമംഗലം:ഹാഷീഷ് ഓയിലും കഞ്ചാവും കൈവശം സൂക്ഷിച്ചതിന് പൊലിസുകാരന്‍ അറസ്റ്റില്‍.തൃശൂര്‍ കെ.എ.പി ബറ്റാലിയനിലെ കോണ്‍സ്റ്റബിള്‍ അടിവാട് സ്വദേശി മുഹമ്മദിനെയാണ് എസ്.പി യുടെ ക്രൈം സ്വകാഡ് അംഗങ്ങളും ഊന്നുകല്‍ പൊലിസും ചേര്‍ന്ന് ഇന്നലെ പുലര്‍ച്ചെ നെല്ലിമറ്റത്ത് നിന്നും കസ്റ്റഡിയിലെടുത്തത്.ചെറിയ അത്തര്‍ കുപ്പിയിലാണ് ഓയില്‍ സൂക്ഷിച്ചിരുന്നത്.10 ഗ്രാം തുക്കം വരുന്ന കഞ്ചാവ് പേപ്പറില്‍ പൊതിഞ്ഞ നിലയിലാണ് കണ്ടെടുത്തത്.
കഴിഞ്ഞ ദിവസം കഞ്ചാവുകേസില്‍ കവളങ്ങാട് മുളമ്പേല്‍ അജ്മല്‍ (28) ഊന്നുകല്‍ കതിര്‍വേലിതണ്ട് നോക്കരയില്‍ ജിതിന്‍ (21) എന്നിവരെ ഊന്നുകല്‍ എസ്.ഐ ടി.എം സൂഫിയുടെ നേതൃത്വത്തിലുള്ള പൊലിസ് സംഘം അറസ്റ്റു ചെയ്തിരുന്നു.ഇരുവരില്‍ നിന്നും 100 ഗ്രാം വീതം കഞ്ചാവ് പൊലിസ് കണ്ടെടുത്തു.
സ്ഥിരം കഞ്ചാവ് കച്ചവടക്കാരായ ഇവര്‍ മുന്‍പും കഞ്ചാവ് വില്‍പന നടത്തിയതിന് പൊലിസ് പിടിയിലായിട്ടുണ്ട്. നെല്ലിമറ്റം, പുത്തന്‍കുരിശ് ഭാഗങ്ങളില്‍ നിന്നാണ് ഇരുവരെയും പൊലിസ് സംഘം കസ്റ്റഡിയില്‍ എടുത്തത്.ഇവര്‍ നല്‍കിയ സൂചനകള്‍ പ്രകാരമാണ് പൊലിസുകാരന്‍ അറസ്റ്റിലായതെന്നാണ് അറിയുന്നത്.
അടുത്തിടെയായി ജില്ലയിലേക്ക് തമിഴ്‌നാട്ടില്‍ നിന്നും കഞ്ചാവ് കടത്ത് ഊര്‍ജ്ജിതമായിരുന്നു.സ്‌കൂളും കോളേജുകള്‍ കേന്ദ്രീകരിച്ചായിരുന്നു പ്രധാനമായും കഞ്ചാവ് വിറ്റഴിക്കപ്പെട്ടിരുന്നത്.സ്‌കൂള്‍ കോളേജ് വിദ്യാര്‍ഥികളടങ്ങുന്ന സംഘം പ്രധാനമായും ബൈക്കിലും കാറിലും മറ്റുമായിട്ടാണ് കഞ്ചാവ് കടത്തിയിരുന്നത്.
ചുരുക്കം ചിലര്‍ സ്‌കൂള്‍ബാഗുകളില്‍ ബസ്സുകള്‍ വഴിയും കഞ്ചാവ് കടത്തുന്നതായി പൊലിസ് എക്‌സൈസ് അധികൃതര്‍ക്ക് വിവരം ലഭിച്ചിരുന്നു.ഇതേത്തുടര്‍ന്ന് ഇടുക്കി-എറണാകുളം ജില്ലകളില്‍ വാഹന പരിശോധന ശക്തമാക്കുകയും അടുത്ത കാലത്ത് വിദ്യാര്‍ഥികള്‍ അടക്കം കഞ്ചാവ് കടത്തല്‍ സംഘത്തില്‍പ്പെട്ട ഇരുപതിധികം പേരെ പൊലിസും എക്‌സൈസും ചേര്‍ന്ന് പിടികൂടുകയും ചെയ്തിരുന്നു.