എകാതെറിന്‍ബര്‍ഗ്: കട്ടയ്ക്ക് കട്ട അതായിരുന്നു ഈജിപ്തും ഉുറുഗ്വെയും തമ്മിലുള്ള മത്സരം. 28 വര്‍ഷത്തെ ഇടവേളയ്ക്ക് ശേഷം വരുന്നുവെന്ന യാതൊരു സങ്കോചവുമില്ലാതെയായിരുന്നു ഉറുഗ്വെയ്‌ക്കെതിരേ ഈജിപ്തിന്റെ മത്സരം.

സ്റ്റാര്‍ സ്‌ട്രൈക്കര്‍ മുഹമ്മദ് സലാഹ് ഇല്ലാതെ കളത്തിലിറങ്ങിയ ഈജിപ്ത് മികച്ച പ്രകടനമാണ് പുറത്തെടുത്തത്. അവസാന നിമിഷം വരെ പൊരുതിയ ഈജിപ്തിന് 88ാം മിനുറ്റില്‍ വഴങ്ങിയ ഫ്രീകിക്കാണ് തിരിച്ചടിയായത്. ലൂയി സുവാരസും കവാനിയും ഉള്‍പ്പെട്ടെ താരനിരയെ പ്രതിരോധിക്കുന്നതില്‍ ഈജിപ്തിന്റെ പ്രതിരോധനിര വിജയിച്ചു.

ഈജിപ്തിന്റെ ഒരു നിമിഷത്തെ പിഴവ് അതായിരുന്നു ഉറുഗ്വെയുടെ വിജയഗോളിലേക്കുള്ള വഴി. മത്സരം അവസാനിക്കാന്‍ രണ്ടു മിനുറ്റു മാത്രം ശേഷിക്കെ ഫ്രീകിക്കിന് തലവച്ച ജിമെനെസിന്റെ സൂപ്പര്‍ ഹെഡറാണ് ഉറുഗ്വെയ്ക്ക് വിജയം സമ്മാനിച്ചത്. വിജയത്തോടെ മത്സരത്തില്‍ മൂന്നു പോയിന്റും ഉറുഗ്വെ നേടി.