മാഹി: പള്ളൂരിലെ സി.പി.എം പ്രാദേശിക നേതാവായിരുന്ന കണ്ണിപൊയില്‍ ബാബുവിനെ കൊലപ്പെടുത്തിയ കേസില്‍ ഒരു ആര്‍.എസ്.എസ് പ്രവര്‍ത്തകന്‍ കൂടി അറസ്റ്റില്‍.
പള്ളൂര്‍ ചെമ്പ്ര സ്വദേശിയായ പുത്തന്‍പുരയില്‍ സനീഷ്(28)നെയാണ് അന്വേഷണ സംഘം വെള്ളിയാഴ്ച രാത്രി എറണാകുളം പിറവത്തെ ഒരു ബേക്കറിയില്‍വച്ച് അറസ്റ്റ് ചെയ്തത്. കഴിഞ്ഞ അഞ്ചിനാണ് ഇയാള്‍ പിറവത്തെ ബേക്കറിയില്‍ ജോലിക്ക് എത്തിയത്. കണ്ണൂര്‍ സ്വദേശിയായ സുധിയുടെ ബേക്കറിയാണിത്.
രണ്ട് വര്‍ഷം മുന്‍പ് ഇവിടെ സനീഷ് ജോലി ചെയ്തിരുന്നുവെന്നും ആ പരിചയത്തിലാണ് വീണ്ടും ജോലിക്കെടുത്തതെന്നും ഉടമ പറഞ്ഞു. പ്രതിക്കായി മാഹി പൊലിസ് നടത്തിയ അന്വേഷണത്തില്‍ മൊബൈല്‍ ടവര്‍ കേന്ദ്രീകരിച്ച് നടത്തിയ അന്വേഷണത്തിലാണ് പ്രതി എവിടെയാണെന്ന് കണ്ടെത്തിയത്. ഇതോടെ കേസില്‍ പിടിയിലായവരുടെ എണ്ണം 8 ആയി. 2016 ഡിസംബറിലും ബാബുവിനെ വധിക്കാന്‍ ലക്ഷ്യമിട്ടിരുന്നതായി പി.കെ നിജേഷും ജെറിന്‍ സുരേഷും അന്വേഷണ സംഘത്തിന് മൊഴി നല്‍കിയിരുന്നു.
മെയ് ഒന്നു മുതല്‍ കൊലയാളി സംഘം പള്ളൂര്‍, ചെമ്പ്ര പ്രദേശങ്ങളില്‍ തങ്ങി ബാബുവിന്റെ നീക്കങ്ങള്‍ നിരീക്ഷിച്ചിരുന്നുവെന്നും വെളിപ്പെടുത്തലുണ്ട്. ഇക്കഴിഞ്ഞ മെയ് 7ന് രാത്രിയാണ് ബാബുവിനെ കൊലയാളി സംഘം വീടിനടുത്ത്‌വച്ച് കൊലപ്പെടുത്തിയത്.