ചെന്നൈ: തമിഴ്‌നാട്ടില്‍ അണ്ണാ ഡി.എം.കെയെയും ബി.ജെ.പിയെയും കടുത്ത ഭാഷയില്‍ വിമര്‍ശിച്ചിരുന്ന പട്ടാളി മക്കള്‍ കക്ഷി, ലോക്‌സഭാ തെരഞ്ഞെടുപ്പില്‍ ഇവരുമായി സഖ്യം സ്ഥാപിച്ചതിനെ ന്യായീകരിച്ച് രംഗത്തെത്തി.

പി.എം.കെയുടെ നിലപാടിനെ പലരും വിമര്‍ശിക്കുന്നുണ്ടെങ്കിലും ജനങ്ങള്‍ ഈ സഖ്യത്തെ അനുകൂലിക്കുന്നുണ്ടെന്ന് ഇന്നലെ ചെന്നൈയില്‍ വിളിച്ചു ചേര്‍ത്ത വാര്‍ത്താസമ്മേളനത്തില്‍ പാര്‍ട്ടി അധ്യക്ഷന്‍ അന്‍പുമണി രാംദോസ് വ്യക്തമാക്കി. 2009, 2011, 2014, 2016 തെരഞ്ഞെടുപ്പുകളില്‍ വലിയ ആശയങ്ങള്‍ മുന്‍നിര്‍ത്തി തെരഞ്ഞെടുപ്പിനെ നേരിട്ടെങ്കിലും ഈ നാല് തെരഞ്ഞെടുപ്പുകളിലും ഒരു സീറ്റില്‍ പോലും വിജയിക്കാനായില്ല. അതുകൊണ്ട് ഇത്തവണ തങ്ങളുടെ തെരഞ്ഞെടുപ്പ് തന്ത്രം മാറ്റിയിരിക്കുകയാണെന്നും അതിന്റെ അടിസ്ഥാനത്തിലാണ് അണ്ണാ ഡി.എം.കെ-ബി.ജെ.പി സഖ്യത്തിന്റെ ഭാഗമായതെന്നും അദ്ദേഹം പറഞ്ഞു. നേരത്തെ അണ്ണാ ഡി.എം.കെ മന്ത്രിമാരുടെ അഴിമതി സംബന്ധിച്ച് തമിഴ്‌നാട്ടില്‍ വലിയ പ്രതിഷേധം ഉയര്‍ത്തിയ പാര്‍ട്ടിയാണ് പി.എം.കെ. അഴിമതി നടത്തിയ മന്ത്രിമാരുടെ ലിസ്റ്റും പാര്‍ട്ടി നേതൃത്വം ഗവര്‍ണര്‍ക്ക് കൈമാറിയിരുന്നു. സഖ്യത്തിന്റെ ഭാഗമായെന്നതുകൊണ്ട് അഴിമതിക്കെതിരായ നിലപാടില്‍ വെള്ളം ചേര്‍ക്കില്ലെന്ന് അന്‍പുമണി രാംദോസ് പറഞ്ഞു.