ന്യൂഡല്‍ഹി: 11 ലക്ഷത്തിലധികം ആദിവാസി കുടുംബങ്ങളെ വനത്തില്‍നിന്ന് ഒഴിപ്പിക്കാനുള്ള സുപ്രിംകോടതി ഉത്തരവ് സ്റ്റേ ചെയ്യണമെന്ന കേന്ദ്രസര്‍ക്കാര്‍ ഹരജി സുപ്രിംകോടതി ഇന്ന് പരിഗണിക്കും. ഫെബ്രുവരി 13ലെ ഉത്തരവ് സ്റ്റേ ചെയ്യണമെന്നാവശ്യപ്പെട്ട് സോളിസിറ്റര്‍ ജനറല്‍ തുഷാര്‍ മേത്ത സമര്‍പ്പിച്ച ഹരജി അരുണ്‍ മിശ്ര, നവീന്‍ സിന്‍ഹ എന്നിവരടങ്ങിയ ബെഞ്ച് മുന്‍പാകെ ഇന്നലെ ഉന്നയിച്ചപ്പോഴാണ് ഇന്ന് പരിഗണിക്കാമെന്ന് കോടതി വ്യക്തമാക്കിയത്.
വനാവകാശ നിയമം കൊണ്ടുവന്നപ്പോള്‍ അതില്‍ വനത്തില്‍ താമസിക്കാന്‍ അവകാശമുള്ള വിഭാഗങ്ങള്‍ക്കായി പ്രത്യേക മാനദണ്ഡം നിശ്ചയിച്ചിരുന്നു. ഇതിന്റെ അടിസ്ഥാനത്തില്‍ കേരളം ഉള്‍പ്പെടെയുള്ള 14 സംസ്ഥാനങ്ങളില്‍ നിന്നായി 11,27,446 കുടുംബങ്ങളുടെ അപേക്ഷകള്‍ തള്ളിയിരുന്നു. ഇവരെ ജൂലൈ 27 നു മുന്‍പ് പുറത്താക്കാനാണ് അരുണ്‍ മിശ്ര, നവീന്‍ സിന്‍ഹ, ഇന്ദിരാബാനര്‍ജി എന്നിവരടങ്ങിയ സുപ്രിംകോടതി ബെഞ്ച് ഉത്തരവിട്ടത്.
സംസ്ഥാനങ്ങള്‍ വനാവകാശ നിയമത്തെ തെറ്റായി വ്യാഖ്യാനിച്ചതാണ് ഇത്രയധികം അപേക്ഷകള്‍ നിരസിക്കപ്പെട്ടതെന്ന് ഹരജിയില്‍ കേന്ദ്രസര്‍ക്കാര്‍ ചൂണ്ടിക്കാട്ടി. ഗ്രാമസഭകള്‍ക്ക് ഇതിനായി അപേക്ഷ നല്‍കുന്നതിനുള്ള നടപടി ക്രമം സംബന്ധിച്ച് ബോധ്യക്കുറവുണ്ട്. പല അപേക്ഷകളിലും നിരസിക്കപ്പെടാനുണ്ടായ കാരണം പോലും അപേക്ഷകരോട് പറഞ്ഞിട്ടില്ല. അവര്‍ക്ക് അപ്പീല്‍ നല്‍കാനുള്ള ശേഷിയുമില്ല. ഇത്രയധികം അപേക്ഷകള്‍ നിരസിക്കപ്പെട്ടതില്‍ ആശങ്കയറിയിച്ച് സംസ്ഥാനങ്ങള്‍ക്ക് പലപ്പോഴായി കത്തെഴുതിയിരുന്നു. വനംവകുപ്പ് അധികൃതര്‍ ആദിവാസികളെ അപ്പീലിനു പോലും സമയം നല്‍കാതെ ധൃതിപിടിച്ച് ഒഴിപ്പിക്കാനുള്ള നടപടി സ്വീകരിക്കുകയാണ് ചെയതതെന്നും കേന്ദ്ര സര്‍ക്കാര്‍ ചൂണ്ടിക്കാട്ടി.
എന്നാല്‍ കേസ് സുപ്രിംകോടതിയുടെ വിവിധ ബെഞ്ചുകളിലായി വര്‍ഷങ്ങളായി ഇഴഞ്ഞുനീങ്ങുന്നുണ്ടായിരുന്നെങ്കിലും കേന്ദ്രസര്‍ക്കാര്‍ കാര്യമായ താല്‍പര്യമെടുത്തില്ല.
കേസ് പരിഗണിക്കുമ്പോള്‍ കേന്ദ്രസര്‍ക്കാര്‍ അഭിഭാഷകര്‍ ഹാജരാകുകയോ എതിര്‍പ്പുന്നയിക്കുകയോ ചെയ്തിരുന്നില്ല. ഉത്തരവിനെതിരേ തിരുത്തല്‍ ഹരജി നല്‍കാന്‍ കോണ്‍ഗ്രസ് ഭരിക്കുന്ന സംസ്ഥാനങ്ങള്‍ തീരുമാനിച്ചതോടെയാണ് കേന്ദ്രസര്‍ക്കാര്‍ നടപടി സ്വീകരിക്കുന്നത്.