നീലേശ്വരം: യു.ഡി.എഫ് ആഹ്വാനം ചെയ്ത ഹര്‍ത്താലിനിടെ നീലേശ്വരത്ത് അക്രമം. മൂന്നു പേര്‍ക്കു പരുക്കേറ്റു. പടന്നക്കാട് കാര്‍ഷിക കോളജ് പ്രവര്‍ത്തിക്കുന്നതറിഞ്ഞ് അടപ്പിക്കാനെത്തിയ കോണ്‍ഗ്രസ് പ്രവര്‍ത്തകര്‍ വിദ്യാര്‍ഥികളെയും അധ്യാപകരേയും ഭീഷണിപ്പെടുത്തിയതായി പരാതിയുണ്ട്. എസ്.എഫ്.ഐ യൂനിറ്റ് പ്രസിഡന്റ് അരുണ്‍ജോസിനെ പരുക്കേറ്റ നിലയില്‍ ആശുപത്രിയില്‍പ്രവേശിപ്പിച്ചിട്ടുണ്ട്. കോളജ് അധികൃതരും വിദ്യാര്‍ഥികളും പൊലിസില്‍ പരാതി നല്‍കി.
അതേസമയം, കോളജിലെത്തിയ തങ്ങളെ എസ്.എഫ്.ഐ പ്രവര്‍ത്തകര്‍ അക്രമിക്കുകയായിരുന്നുവെന്ന് കോണ്‍ഗ്രസ് പ്രവര്‍ത്തകര്‍ പറഞ്ഞു. കോണ്‍ഗ്രസ് പ്രവര്‍ത്തകരായ കെ.ആര്‍ രാകേഷ്, സായ്കിരണ്‍ എന്നിവര്‍ താലൂക്ക് ആശുപത്രിയിലും ചികിത്സയിലാണ്. ഹര്‍ത്താല്‍ നീലേശ്വരത്ത് പൂര്‍ണമായിരുന്നു. ഹര്‍ത്താല്‍ അനുകൂലികള്‍ ദേശീയപാതയില്‍ മാര്‍ക്കറ്റ് ജങ്ഷനില്‍ വാഹനങ്ങളും തടഞ്ഞു.