കണ്ണൂര്‍: ഇടപാടുകള്‍ സുതാര്യവും ആധുനികവുമാക്കുന്നതിന് പ്രഖ്യാപിച്ച സംസ്ഥാന ട്രഷറി വകുപ്പിന്റെ പദ്ധതികള്‍ ലക്ഷ്യത്തിലേക്ക്. ട്രഷറിയെ ഹൈടെക് നിലവാരത്തിലേക്ക് എത്തിക്കുന്നതിന് നടപ്പാക്കുന്ന ഇന്റഗ്രേറ്റഡ് ഫിനാന്‍ഷ്യല്‍ മാനേജ്‌മെന്റ് സംവിധാനമാണ് ലക്ഷ്യത്തിലെത്തുന്നത്. ട്രഷറി സേവിങ്‌സ് ബാങ്കിന് മറ്റു ബാങ്കുകളുമായി സഹകരിച്ച് എ.ടി.എം സംവിധാനവും ഡിജിറ്റല്‍ ബില്ല് സംവിധാനവും ആരംഭിക്കാനുള്ള ഒരുക്കത്തിലാണ് സംസ്ഥാന ധനകാര്യ വകുപ്പ്.
ഇന്റഗ്രേറ്റഡ് ഫിനാന്‍ഷ്യല്‍ മാനേജ്‌മെന്റ് സിസ്റ്റം എന്ന പദ്ധതി പ്രകാരം കടലാസ്-കറന്‍സി രഹിത സേവനമാണ് ധനകാര്യ വകുപ്പ് ലക്ഷ്യമിടുന്നത്. ഈ പദ്ധതിയുടെ പ്രധാന പ്രവര്‍ത്തനങ്ങള്‍ നടപ്പിലാക്കിക്കഴിഞ്ഞു. ഇതോടെ ട്രഷറികളുടെ പ്രവര്‍ത്തനം വേഗം കൈവരിച്ചിട്ടുണ്ട്. ഇടപാടുകാര്‍ക്ക് ട്രഷറിയില്‍ എത്താതെ തന്നെ സേവനങ്ങള്‍ ലഭ്യമായി തുടങ്ങി.
ദേശസാല്‍കൃത ബാങ്കുകള്‍ക്ക് സമാനമായി ഓണ്‍ലൈന്‍ ഇടപാടുകള്‍ ഉടന്‍ ആരംഭിക്കും. ട്രഷറി അക്കൗണ്ട് ഉടമകള്‍ക്ക് യൂട്ടിലിറ്റി പെയ്‌മെന്റിനുള്ള സൗകര്യവും മൊബൈല്‍ ആപ്ലിക്കേഷനും ഉടന്‍ നടപ്പിലാക്കും. കൂടാതെ മൊബൈല്‍ ബാങ്കിങ്, ഇന്റര്‍നെറ്റ് ബാങ്കിങ് തുടങ്ങിയവയുടെ പ്രവര്‍ത്തനവും പുരോഗമിക്കുന്നുണ്ട്.
മാസങ്ങള്‍ക്കുള്ളില്‍ തന്നെ ഈ സേവനങ്ങള്‍ പൊതുജനങ്ങള്‍ക്ക് ലഭിക്കും. സര്‍ക്കാര്‍ ബില്ലുകള്‍ നിലവില്‍ പേപ്പര്‍ ബില്ലായാണ് ട്രഷറിയില്‍ സമര്‍പ്പിക്കുന്നത്. എന്നാല്‍ ഇന്റഗ്രേറ്റഡ് ഫിനാന്‍ഷ്യല്‍ മാനേജ്‌മെന്റ് സിസ്റ്റം പൂര്‍ത്തിയാകുന്നതോടെ ഉദ്യോഗസ്ഥരുടെ സീലും ഒപ്പും ഇല്ലാത്ത ഡിജിറ്റല്‍ ബില്‍ സംവിധാനത്തിലേക്ക് ട്രഷറി നീങ്ങും.
ട്രഷറിയുടെ ഓഫിസ് മാതൃകതന്നെ മാറ്റുന്നതിനും ദേശസാല്‍കൃത ബാങ്കുകളുടെ ഓഫിസ് മാതൃകയില്‍ ഉപഭോക്തൃ സൗഹൃദമാക്കുന്നതിനും നടപടി ആരംഭിച്ചുകഴിഞ്ഞു. പെന്‍ഷന്‍കാരുടെ സേവനങ്ങളും ആധുനികവല്‍ക്കരിച്ചിട്ടുണ്ട്. നിലവില്‍ പെന്‍ഷന്‍ സംബന്ധിച്ചുള്ള വിശദവിവരങ്ങള്‍, പ്രതിമാസ പെന്‍ഷന്‍, കുടിശ്ശിക വരവ്‌വച്ചതിന്റെ വിവരങ്ങള്‍, ആദായ നികുതി സംബന്ധിച്ചുള്ളവ എന്നിവ പെന്‍ഷന്‍ പോര്‍ട്ടലില്‍ കഴിഞ്ഞ വര്‍ഷം മുതല്‍ ലഭ്യമാക്കി തുടങ്ങിയിട്ടുണ്ട്.