വടക്കാഞ്ചേരി: നടു റോഡില്‍ മാലിന്യങ്ങള്‍ നിക്ഷേപിച്ചു സാമൂഹ്യ വിരുദ്ധരുടെ വിളയാട്ടം. വടക്കാഞ്ചേരി നഗരസഭയില്‍ അത്താണി മങ്ങാട് റോഡില്‍ ആര്യംപാടം മുതല്‍ പുതുരുത്തി കോട്ടപ്പുറം വരെ 25 ഓളം സ്ഥലങ്ങളിലാണു അറവു മാലിന്യങ്ങള്‍ ചാക്കില്‍ കെട്ടി നിക്ഷേപിച്ചത്.
ജനവാസ മേഖലയായ ഈ പ്രദേശങ്ങള്‍ ദുര്‍ഗന്ധപൂരിതമാണ്. തെരുവുനായകളും കുറുക്കന്മാരും കടിച്ചു വലിച്ചും കാക്കകളും മറ്റു പക്ഷികളും കൊത്തിവലിച്ചും മാലിന്യം നാടാകെ പരത്തിയിരിക്കുകയാണ്. ഇതോടെ കാല്‍ നടയാത്ര പോലും ദുഷ്‌കരമായ അവസ്ഥയിലായി. വിവരം അറിഞ്ഞു സ്ഥലത്തെത്തിയ ഡിവിഷന്‍ കൗണ്‍സിലര്‍ കെ. മണികണ്ഠന്റെ നേതൃത്വത്തില്‍ നാട്ടുകാര്‍ ജെ.സി.ബി ഉപയോഗിച്ചു 20 ഓളം വന്‍ കുഴികളുണ്ടാക്കി മാലിന്യങ്ങള്‍ കുഴിച്ചുമൂടി. വടക്കാഞ്ചേരി പൊലിസില്‍ പരാതി നല്‍കി.