പൂച്ചാക്കല്‍: റോഡരികില്‍ മാലിന്യം നിക്ഷേപിച്ചതിനെ തുടര്‍ന്ന് പൊലിസെത്തി മാലിന്യം തിരികെയെടുപ്പിച്ചു. ചേര്‍ത്തല അരൂക്കുറ്റി റോഡില്‍ മാക്കേക്കവലക്ക് സമീപം ശനിയാഴ്ചയാണ് സംഭവം. പട്ടാപ്പകലാണ് ടിപ്പറില്‍ കൊണ്ടുവന്ന മാലിന്യം റോഡരികില്‍ തള്ളിയത്. ഇത് ശ്രദ്ധയില്‍പെട്ട നാട്ടുകാര്‍ വാഹനം തടഞ്ഞിട്ട് ജനപ്രതിനിധികളെയും പൊലിസിനെയും വിവരം അറിയിക്കുകയായിരുന്നു.
തുടര്‍ന്ന് പൊലിസ് മാലിന്യം തിരികെ എടുപ്പിക്കുകയായിരുന്നു. ജെ.സി.ബി ഉപയോഗിച്ചാണ് മാലിന്യം തിരികെ കയറ്റി വിട്ടത്. തുറവൂര്‍ കേന്ദ്രമായ സംഘമാണ് മാലിന്യം കൊണ്ടുവന്ന് തള്ളിയതെന്ന് പൊലിസ് പറഞ്ഞു.
മാക്കേകവല, മണപ്പുറം പ്രദേശങ്ങളില്‍ കക്കൂസ് മാലിന്യം ഉള്‍പ്പെടെ തള്ളുന്നത് നിത്യസംഭവമായിട്ടുണ്ട്. പ്രദേശത്ത് സി.സി.ടി.വി കാമറ സ്ഥാപിക്കണമെന്ന് പഞ്ചായത്തംഗം എന്‍.പി പ്രദീപ് ആവശ്യപ്പെട്ടു.