വാഗ: പാകിസ്താന്റെ പിടിയിലായിരുന്ന ഇന്ത്യന്‍ വ്യോമ സേനാ വിങ് കമാന്‍ഡര്‍ അഭിനന്ദന്‍ വര്‍ധ്മാനെ ഇന്ത്യയ്ക്കു കൈമാറി. രാത്രി ഒന്പത്  മണിയോടെ വാഗ- അട്ടാരി അതിര്‍ത്തി വഴിയാണ് ഇന്ത്യയ്ക്കു കൈമാറിയത്. ഐ.എ.എഫ് ഉദ്യോഗസ്ഥരാണ് അഭിനന്ദനെ സ്വീകരിച്ചത്.

വലിയ ആരവത്തോടെയാണ് ഇന്ത്യന്‍ അതിര്‍ത്തിയില്‍ കമാന്‍ഡറെ സ്വീകരിച്ചത്. പിതാവ് എസ്. വര്‍ധ്മാനും മാതാവ് ശോഭാ എസ്. വര്‍ധ്മാനും ചടങ്ങിലേക്ക് നേരിട്ടെത്തിയിരുന്നു. വിവിധ സംസ്ഥാനങ്ങളില്‍ നിന്നായി നിരവധി പേരാണ് ഇതുകൂടാതെ എത്തിച്ചേര്‍ന്നിരുന്നത്.

പാകിസ്താന്‍ അതിര്‍ത്തിയില്‍ വൈദ്യപരിശോധനയും കഴിഞ്ഞാണ് അഭിനന്ദനെ ഇന്ത്യയ്ക്കു കൈമാറിയത്. ഭാവിയില്‍ വിമര്‍ശനം നേരിടാതിരിക്കാനുള്ള നടപടിയാണ് ഇതെന്നാണ് കരുതുന്നത്.

പഞ്ചാബ് മുഖ്യമന്ത്രി അമരീന്ദര്‍ സിങും കേന്ദ്ര പ്രതിരോധ മന്ത്രി നിര്‍മലാ സീതാരാമനും അതിര്‍ത്തിയില്‍ എത്തുമെന്ന് നേരത്തെ അറിയിച്ചിരുന്നുവെങ്കിലും പിന്നീട് മാറ്റിവച്ചു. രാഷ്ട്രീയ രംഗത്തുള്ളവര്‍ ആരും പോവേണ്ടതില്ലെന്ന തീരുമാനത്തെ തുടര്‍ന്നാണിത്.

പാകിസ്താന്റെ ഭാഗത്തു നിന്ന് ബീറ്റിങ് റീട്രീറ്റ് നടത്തിയാണ് അഭിനന്ദന്‍ വര്‍ത്തമാനെ ഇന്ത്യയ്ക്ക് കൈമാറിയത്. എന്നാല്‍ പാകിസ്താനെതിരെ ശക്തമായ സന്ദേശം നല്‍കുന്നതിന്റെ ഭാഗമായി ഇന്ത്യ ഈ ചടങ്ങ് റദ്ദാക്കുകയും ചെയ്തു.

20,000 ത്തില്‍ അധികം പേര്‍ അതിര്‍ത്തിയില്‍ എത്തിച്ചേര്‍ന്നിട്ടുണ്ടെന്നാണ് അധികൃതര്‍ കണക്കാക്കുന്നത്.