നാദാപുരം: പെരുന്നാള്‍ തലേന്ന് കല്ലാച്ചി കൈരളി കോംപ്ലക്‌സില്‍ സാമൂഹ്യദ്രോഹികളുടെ അഴിഞ്ഞട്ടത്തില്‍നിരവധി സ്ഥാപനങ്ങള്‍ക്ക് കേടുപാടുകള്‍ സംഭവിച്ചു. സംഭവം ചോദ്യം ചെയ്ത അമ്പിടാട്ടില്‍ മുജീബി (21) നെ ക്രുരമായി മര്‍ദിച്ചു. മുഖത്തും അടിവയറ്റിലും പരുക്കേറ്റ ഇയാളെ സ്വകാര്യ ആശുപത്രിയില്‍ പ്രവേശിപ്പിച്ചു. ചൊവ്വാഴ്ച അര്‍ധരാത്രിയോടെയാണ് പെരുന്നാള്‍ ആഘോഷിക്കാനെന്ന പേരില്‍ തൊട്ടടുത്ത ചീറോത്ത് മുക്കിലെ ഒരു സഘം ആളുകള്‍ കൈരളി കോംപ്ലക്ലസിനുള്ളില്‍ അക്രമംഅഴിച്ചുവിട്ടത്. കൈയില്‍ കരുതിയ ഉഗ്രശേഷിയുള്ള പടക്കങ്ങള്‍ കോംപ്ലക്‌സിലെ അടച്ചിട്ട കടകളുടെ വരാന്തയില്‍ വച്ച് പൊട്ടിച്ചു ഭീകരാന്തരീക്ഷം സൃഷ്ടിക്കുകയായിരുന്നു. ഇതേ തുടര്‍ന്ന് കെട്ടിടത്തിനുള്ളില്‍ പെരുന്നാളിനാവശ്യമായ സാധനങ്ങള്‍ വാങ്ങാന്‍ എത്തിയവര്‍ ചിതറിയോടി. കച്ചവടക്കാരുടെ പരാതി പ്രകാരം സ്ഥലത്തെത്തിയ മുജീബ് അക്രമികളോട് പുറത്ത് പോകാന്‍ ആവശ്യപ്പെടുന്നതിനിടയിലാണ് സംഘം മര്‍ദിച്ചത്. കെട്ടിട ഉടമയുടെ പരാതി പ്രകാരം പൊലിസ് കേസെടുത്തു.
വാര്‍ഡ് മെമ്പറുടെ സഹോദരന്റെ നേതൃത്വത്തിലുള്ള സംഘമാണ് അക്രമത്തിനു പിന്നിലെന്ന് പരാതിയില്‍ പറയുന്നു.