സിയൂള്‍: ഡൊണാള്‍ഡ് ട്രംപുമായുള്ള കിം ജോങ് ഉന്നിന്റെ കൂടിക്കാഴ്ചയ്ക്കു പിറകെ കൊറിയന്‍ ഐക്യനീക്കങ്ങള്‍ ത്വരിതഗതിയില്‍. ഈ വര്‍ഷം നടക്കുന്ന ഏഷ്യന്‍ ഗെയിംസില്‍ ഒന്നിച്ചു മത്സരിക്കാന്‍ ഉത്തര-ദക്ഷിണ കൊറിയകള്‍ക്കിടയില്‍ ആലോചന. ശീതകാല ഒളിംപിക്‌സില്‍ ഇരുകൊറിയന്‍ ടീമുകളും ഉദ്ഘാടന ചടങ്ങില്‍ നടന്ന പരേഡില്‍ ഒന്നിച്ച് അണിനിരന്നിരുന്നു. ഓഗസ്റ്റ് 18 മുതല്‍ സെപ്റ്റംബര്‍ രണ്ടുവരെ ഇന്തോനേഷ്യന്‍ തലസ്ഥാനമായ ജക്കാര്‍ത്തയില്‍ വച്ചാണ് 2018 ഏഷ്യന്‍ ഗെയിംസ് നടക്കുന്നത്. രാജ്യാന്തര കായിക മത്സരങ്ങളില്‍ ഒന്നിച്ചു മത്സരിക്കാന്‍ ഏപ്രില്‍ 27നു നടന്ന ചരിത്രപരമായ കൊറിയന്‍ ഉച്ചകോടിയില്‍ തീരുമാനമായിരുന്നു. ഏഷ്യന്‍ ഗെയിംസില്‍ ഇതിനു തുടക്കമിടാനായിരുന്നു പദ്ധതി. ഇതിനു വേണ്ട ചര്‍ച്ചകള്‍ ആരംഭിച്ചതായി ദക്ഷിണ കൊറിയന്‍ കായിക മന്ത്രാലയം പുറത്തുവിട്ട സംയുക്ത വാര്‍ത്താകുറിപ്പില്‍ അറിയിച്ചു. ഉദ്ഘാടന-സമാപന പരേഡുകളിലും ഏതാനും മത്സരങ്ങളിലും ഇരുരാജ്യത്തിന്റെയും ടീമുകള്‍ ഒന്നിച്ചിറങ്ങാനാണ് ആലോചന നടക്കുന്നതെന്ന് വാര്‍ത്താകുറിപ്പില്‍ പറയുന്നു. കൊറിയ എന്ന പേരിലാകും ടീം മത്സരിക്കുക.