ശ്രീനഗര്‍: ജമ്മു കശ്മിരില്‍ കനത്ത മഞ്ഞു വീഴ്ചയില്‍ കാണാതായ മൂന്ന് സൈനികരുടെ മൃതദേഹങ്ങള്‍ കണ്ടെടുത്തു. ലഡാക്ക് ജില്ലയിലെ ബട്ടാലിക് സെക്ടറിലെ സൈനിക താവളത്തിലുണ്ടായ തുടര്‍ച്ചയായ മഞ്ഞുവീഴ്ചയിലാണ് സൈനികരെ കാണാതായിരുന്നത്.
തുടര്‍ന്ന് നടത്തിയ തെരച്ചിലിലാണ് ഇവരുടെ മൃതദേഹങ്ങള്‍ കണ്ടെത്തിയത്. മഞ്ഞുവീഴ്ചയില്‍ അഞ്ച് സൈനികരാണ് കുടുങ്ങിയിരുന്നത്. ഇവരില്‍ രണ്ടുപേരെ കഴിഞ്ഞ ദിവസം രക്ഷപ്പെടുത്തിയിരുന്നു. കാണാതായ മൂന്നുപേര്‍ക്കു വേണ്ടി തെരച്ചില്‍ തുടരുന്നതിനിടയിലാണ് മൃതദേഹം കണ്ടെത്തിയത്.
അതിനിടയില്‍ മറ്റൊരു സൈനിക പോസ്റ്റ് സ്ഥിതി ചെയ്യുന്ന കക്‌സാര്‍ സെക്ടറിലും കനത്ത മഞ്ഞുവീഴ്ചയാണ്. ഇവിടെ ആര്‍ക്കെങ്കിലും അപകടമുണ്ടായതായി റിപ്പോര്‍ട്ടില്ലെന്ന് സൈനിക വക്താവ് അറിയിച്ചു. ഇവിടെ സൈനികരെ സുരക്ഷിത സ്ഥാനത്തേക്ക് മാറ്റികൊണ്ടിരിക്കുകയാണ്.