നാളെ മുതല്‍ കേരള രജിസ്‌ട്രേഷനുള്ള ബോട്ടുകള്‍ക്ക് നിയന്ത്രണങ്ങളോടെ അനുമതി
തിരുവനന്തപുരം: സംസ്ഥാനത്ത് ലോക്ക് ഡൗണ്‍ മാനദണ്ഡങ്ങളില്‍ ഇളവ് അനുവദിക്കുന്ന സാഹചര്യത്തില്‍ രണ്ടുഘട്ടമായി മത്സ്യബന്ധനത്തിനും ഇളവുകള്‍ നല്‍കി. മുഴുവന്‍ മത്സ്യബന്ധന യാനങ്ങളും പുറപ്പെടുന്നതിന് 24 മണിക്കൂര്‍ മുന്‍പ് ബന്ധപ്പെട്ട ഫിഷറീസ് ഓഫിസില്‍ റിപ്പോര്‍ട്ട് ചെയ്യണം. മത്സ്യബന്ധനത്തിന് പോവുന്ന തൊഴിലാളികളുടെ ഫോണ്‍ നമ്പര്‍ ഉള്‍പ്പെടെയുള്ള വിശദവിവരം നല്‍കുകയും വേണം. മെയ് ഒന്നിന് ആരംഭിച്ച ഒന്നാംഘട്ടത്തില്‍ ചെറിയ വള്ളങ്ങളില്‍ പരമാവധി 5 മത്സ്യത്തൊഴിലാളികള്‍ വരെ മത്സ്യബന്ധനം നടത്താം. ഇലക്ട്രിക്കല്‍ ലൈറ്റ് ഉപയോഗിക്കരുത്. മത്സ്യബന്ധനം നടത്തുന്നതിന് കമ്പയുടെ ഓരോ അഗ്രത്തിലും 12 പേരില്‍ കൂടുതല്‍ പേര്‍ പാടില്ല. വ്യക്തികള്‍ തമ്മില്‍ കുറഞ്ഞത് ഒരുമീറ്റര്‍ അകലം പാലിക്കണം.
നാളെ ആരംഭിക്കുന്ന രണ്ടാംഘട്ടത്തില്‍ കേരള രജിസ്‌ട്രേഷനുള്ള യന്ത്രവല്‍കൃത ബോട്ടുകള്‍ക്ക് പരമാവധി 10 മത്സ്യത്തൊഴിലാളികളെ ഉള്‍പ്പെടുത്തി ഒന്നിടവിട്ട ദിവസങ്ങളില്‍ ഏകദിന മത്സ്യബന്ധനം നടത്താം. രജിസ്‌ട്രേഷന്‍ നമ്പര്‍ ഒറ്റ അക്കത്തില്‍ അവസാനിക്കുന്ന ബോട്ടുകള്‍ തിങ്കള്‍, ബുധന്‍, വെള്ളി ദിവസങ്ങളിലും ഇരട്ട അക്കത്തില്‍ അവസാനിക്കുന്ന ബോട്ടുകള്‍ക്ക് ചൊവ്വ, വ്യാഴം, ശനി ദിവസങ്ങളിലും മത്സ്യബന്ധനം നടത്താം. പരമ്പരാഗത യാനങ്ങള്‍ക്കും ഇന്‍ബോഡ് വള്ളങ്ങള്‍ക്കും ഒന്നിടവിട്ട ദിവസങ്ങളില്‍ ഏകദിന മത്സ്യബന്ധനം നടത്താം. വ്യക്തികള്‍ തമ്മില്‍ സാമൂഹിക അകലം പാലിക്കണം.