ദുബായ്: ഐസിസി ചാമ്പ്യൻസ് ട്രോഫിയിൽ പാകിസ്താനെതിരെയുള്ള മത്സരത്തിൽ സെഞ്ച്വറി നേടി ഇന്ത്യൻ സൂപ്പർതാരം വിരാട് കോഹ്‌ലി തിളങ്ങിയിരുന്നു. ഏകദിനത്തിലെ തന്റെ 51ാം സെഞ്ച്വറിയാണ് കോഹ്‌ലി പാകിസ്താനെതിരെ നേടിയത്. ഇപ്പോൾ കോഹ്‌ലിയുടെ ഈ തകർപ്പൻ പ്രകടനങ്ങളെ പ്രശംസിച്ചുകൊണ്ട് സംസാരിക്കുകയാണ് മുൻ ഇന്ത്യൻ താരം നവജ്യോത് സിങ് സിദ്ധു. വിരാട് ഇനി രണ്ടോ മൂന്നോ വര്ഷം കൂടി കളിക്കുമെന്നാണ് മുൻ ഇന്ത്യൻ താരം പറഞ്ഞത്. സ്റ്റാർ സ്പോർട്സിലൂടെയാണ് അദ്ദേഹം ഇക്കാര്യം പറഞ്ഞത്. 

'ക്രിക്കറ്റിനോട് മികച്ച അഭിനിവേശവുമുള്ള ഒരു മനുഷ്യനാണ് വിരാട് കോഹ്‌ലി. ഇപ്പോൾ നേടിയ ഈ സെഞ്ച്വറിക്ക് ശേഷം അദ്ദേഹം അടുത്ത രണ്ടോ മൂന്നോ വർഷം വരെ ഇനിയും ക്രിക്കറ്റ് കളിക്കും. ഇനിയും കോഹ്‌ലി പത്തോ പതിനഞ്ചോ സെഞ്ച്വറികൾ നേടുമെന്ന് എനിക്ക് വളരെ ബോധ്യത്തോടെ പറയാൻ സാധിക്കും,' മുൻ ഇന്ത്യൻ താരം പറഞ്ഞു. 

പാകിസ്താനെതിരെയുള്ള മത്സരത്തിൽ 111 പന്തിൽ പുറത്താവാതെ 100 റൺസാണ് കോഹ്‌ലി നേടിയത്. ഏഴ് ഫോറുകൾ അടങ്ങുന്നതായിരുന്നു താരത്തിന്റെ ഇന്നിംഗ്സ്. ഏകദിനത്തിലെ കോഹ്‌ലിയുടെ 51ാം സെഞ്ച്വറിയാണിത്. മത്സരത്തിൽ ഏകദിന ക്രിക്കറ്റിൽ 14,000 റൺസ് പൂർത്തിയാക്കാനും കോഹ്‌ലിക്ക് സാധിച്ചിരുന്നു. മാത്രമല്ല ഏകദിനത്തിൽ ഏറ്റവും വേഗത്തിൽ 14,000 റൺസ് പൂർത്തിയാക്കുന്ന താരമായും കോഹ്‌ലി മാറി. 287 ഇന്നിംഗ്സുകളിൽ നിന്നുമാണ് 14,000 ഈ നേട്ടം സ്വന്തമാക്കിയത്. 

മത്സരത്തിൽ പാകിസ്താനെ ആറ് വിക്കറ്റുകൾക്കാണ് ഇന്ത്യ പരാജയപ്പെടുത്തിയത്. മത്സരത്തിൽ ആദ്യം ബാറ്റ് ചെയ്ത പാകിസ്താൻ 241 റൺസാണ് നേടിയത്. വിജയലക്ഷ്യം പിന്തുടർന്നിറങ്ങിയ ഇന്ത്യ ആറ് വിക്കറ്റുകൾ ബാക്കിനിൽക്കേ ലക്ഷ്യം മറികടക്കുകയായിരുന്നു. മാർച്ച് രണ്ടിന് ന്യൂസിലാൻഡിനെതിരെയാണ് ഇന്ത്യയുടെ അടുത്ത മത്സരം