പോർച്ചുഗീസ് ഇതിഹാസതാരം ക്രിസ്റ്റ്യാനോ റൊണാൾഡോ തന്റെ 40ാം വയസ്സിലും പ്രായം പോലും തളർത്താത്ത പോരാട്ടവീര്യമാണ് ഫുട്ബോളിൽ നടത്തിക്കൊണ്ടിരിക്കുന്നത്. ഇതിനോടകം തന്നെ വ്യത്യസ്ത ടീമുകൾക്ക് വേണ്ടി ബൂട്ട് കെട്ടിക്കൊണ്ട് റൊണാൾഡോ 924 ഗോളുകളാണ് അടിച്ചുകൂട്ടിയിട്ടുള്ളത്. ഫുട്ബോളിലെ ഏറ്റവും മികച്ച താരം താനാണെന്ന് അടുത്തിടെ റൊണാൾഡോ പറഞ്ഞിരുന്നു. യണൽ മെസി, ഡീഗോ മറഡോണ, പെലെ എന്നിവരെക്കാൾ ഫുട്ബോളിൽ പൂർണ്ണനായ താരം താനാണെന്നാണ് റൊണാൾഡോ പറഞ്ഞത്. എഡു അഗ്യൂറുമായുള്ള അഭിമുഖത്തിലാണ് അൽ നസർ നായകൻ ഇക്കാര്യം പറഞ്ഞത്.

ഇപ്പോൾ റൊണാൾഡോയുടെ ഈ അഭിപ്രായത്തെക്കുറിച്ച് സംസാരിക്കുകയാണ് ഫ്രഞ്ച് സൂപ്പർതാരം കരിം ബെൻസിമ. എല്ലാവര്ക്കും അവരുടേതായ അഭിപ്രായങ്ങൾ ഉണ്ടെന്നും ഫുട്ബോളിലെ ഏറ്റവും മികച്ച താരമായി ബ്രസീലിയൻ ഇതിഹാസം റൊണാൾഡോ നാസാരിയോയെയാണ് ബെൻസിമ തെരഞ്ഞെടുത്തത്. ടിഎൻടി സ്പോർട്സിന് നൽകിയ അഭിമുഖത്തിലാണ് ബെൻസിമ ഇക്കാര്യം പറഞ്ഞത്. 

'എല്ലാവർക്കും അവർക്ക് ഇഷ്ടമുള്ളത് പറയാം. ഫുട്ബോൾ ചരിത്രത്തിലെ ഏറ്റവും മികച്ച താരം താനാണെന്ന് ഒരാൾ ചിന്തിക്കുന്നുണ്ടെങ്കിൽ അയാൾ അങ്ങനെ തന്നെയായിയിരിക്കും. എന്നെ സംബന്ധിച്ചിടത്തോളം ബ്രസീലിൽ നിന്നുള്ള റൊണാൾഡോയാണ് മികച്ച താരം. താരങ്ങൾ തമ്മിലുള്ള താരതമ്യങ്ങൾ ഞാൻ ഇഷ്ടപ്പെടുന്നില്ല. ഫുട്ബോളിൽ ഓരോ താരങ്ങൾക്കും അവരുടേതായ കഥകളുണ്ട്,' കരിം ബെൻസിമ പറഞ്ഞു. 

ഫുട്ബോൾ ചരിത്രത്തിലെ എക്കാലത്തെയും മികച്ച സ്‌ട്രൈക്കർമാരിൽ ഒരാളാണ് റൊണാൾഡോ നസാരിയോ. 1993 മുതൽ 2011 വരെയുള്ള കാലഘട്ടങ്ങളിൽ ഐതിഹാസികമായ ഫുട്ബോൾ കരിയറാണ് നസാരിയോ സൃഷ്ടിച്ചെടുത്തത്. ബ്രസീലിനൊപ്പം രണ്ട് വീതം ലോകകപ്പും കോപ്പ അമേരിക്ക കിരീടങ്ങളാണ് റൊണാൾഡോ നേടിയത്. ബ്രസീലിനായി 99 മത്സരങ്ങളിൽ നിന്നും 62 ഗോളുകളാണ് റൊണാൾഡോ നസാരിയോ നേടിയത്. 

ക്ലബ് തലത്തിൽ റയൽ മാഡ്രിഡ്, ബാഴ്‌സലോണ, ഇന്റർ മിലാൻ എന്നീ ടീമുകൾ വേണ്ടി തകർപ്പൻ പ്രകടനമാണ് നടത്തിയത്. രണ്ട് വീതം ലാ ലിഗ കിരീടങ്ങൾ, രണ്ട് സൂപ്പർ കോപ്പ ഡി എസ്‌പാന ട്രോഫികൾ ഓരോ വീതം യുവേഫ കപ്പ്, കോപ്പ ഡെൽ റേ കിരീടം, രണ്ട് സൂപ്പർ കോപ്പ ഡി എസ്‌പാന ട്രോഫികൾ എന്നീ കിരീടങ്ങളാണ് താരം ക്ലബ് തലത്തിൽ നേടിയെടുത്തത്.