ന്യൂഡല്‍ഹി: കൊവിഡിനെതിരേ രാജ്യത്തെ ആരോഗ്യപ്രവര്‍ത്തകരടക്കമുള്ള മുന്നണിപ്പോരാളികള്‍ക്ക് ആദരമര്‍പ്പിക്കാന്‍ സൈന്യം.
വ്യോമസേന ഇന്ന് ഫ്‌ളൈപാസ്റ്റ് നടത്തും. ജമ്മു- കശ്മീര്‍ മുതല്‍ തിരുവനന്തപുരം വരെയും പശ്ചിമ ബംഗാള്‍ മുതല്‍ ഗുജറാത്ത് വരെയുമായിരിക്കും ഫ്‌ളൈപാസ്റ്റ്. ആശുപത്രികള്‍ക്കു മുകളില്‍ ഹെലികോപ്റ്ററില്‍ പൂക്കള്‍ വിതറും.
തീരത്ത് നാവികസേനാ കപ്പലുകളില്‍ ദീപം തെളിയിക്കും. കോവിഡ് ചികിത്സ നടത്തുന്ന ആശുപത്രികള്‍ക്കു സമീപം കരസേന ബാന്‍ഡ് പ്രകടനം നടത്തും.സംയുക്ത സൈനിക മേധാവി (ചീഫ് ഓഫ് ഡിഫന്‍സ് സ്റ്റാഫ് സി.ഡി.എസ്) ബിപിന്‍ റാവത്താണ് കഴിഞ്ഞ ദിവസം ഇക്കാര്യം അറിയിച്ചത്.
കൊവിഡിനെതിരേ പോരാടുന്ന ഡോക്ടര്‍മാര്‍, നഴ്‌സുമാര്‍, ശുചീകരണ തൊഴിലാളികള്‍, പൊലിസ്, ഹോം ഗാര്‍ഡ്, ഡെലിവറി ബോയ്‌സ്, മാധ്യമങ്ങള്‍ ഉള്‍പ്പെടെയുള്ളവര്‍ക്ക് സായുധസേനയുടെ നന്ദി അറിയിക്കാനാണിതെന്നും ബിപിന്‍ റാവത്ത് പറഞ്ഞു.