ശാസ്താംകോട്ട: വേനല്‍ കടുത്തതോടെ കുടിവെള്ളത്തിനായി വലഞ്ഞ വാനരന്മാര്‍ വീടുകളിലേക്കിറങ്ങിയതോടെ നാട്ടുകാരുടെ കുടിവെള്ളവും മുടങ്ങി. തടാകരയില്‍നിന്ന് വെള്ളം ഉള്‍വലിഞ്ഞതോടെയാണു വാനരന്മാര്‍ വീടുകളിലെത്തിയത്. വെള്ളം കുടിക്കാനുള്ള പരാക്രമത്തിനിടയില്‍ ടാപ്പുകള്‍ പിടിച്ചൊടിക്കുകയും വാട്ടര്‍ ടാങ്കിന്റെ മേല്‍മൂടി ഇളക്കി അതില്‍ കുളിക്കുകയും ചെയ്യുന്ന വിരുതന്‍മാരുമുണ്ട് ഇവരുടെ കൂട്ടത്തില്‍. വാട്ടര്‍ അതോറിറ്റിയില്‍നിന്ന് ആഴ്ചയില്‍ രണ്ടുതവണ മാത്രം കിട്ടുന്ന കുടിവെള്ളത്തില്‍ വാനരന്മാര്‍ നടത്തുന്ന കടന്നാക്രമണത്തില്‍ പൊറുതിമുട്ടി വലയുകയാണു നാട്ടുകാര്‍.