ന്യൂഡല്‍ഹി: വ്യോമസേന വിങ് കമാന്‍ഡര്‍ അഭിനന്ദന്‍ വര്‍ധമാന്റെ പുതിയ വീഡിയോ പുറത്തുവിട്ട് പാകിസ്താന്‍. അഭിനന്ദനെ ഇന്ത്യയ്ക്ക് കൈമാറിയതിനു പിന്നാലെ രാത്രി 9 മണിയോടെയാണ് വീഡിയോ പുറത്തുവന്നത്. ഏകദേശം ഒന്നര മിനിറ്റ് ദൈര്‍ഘ്യമുള്ള വീഡിയോയില്‍ പതിനേഴ് തവണയാണ് എഡിറ്റുകള്‍ വരുത്തിയത്.

തിരിച്ചെത്തുമെന്നറിയിച്ച സമയത്തിലും മൂന്ന് മണിക്കൂർ വൈകിയാണ് അഭിനന്ദന്‍ ഇന്ത്യയിലെത്തിയത്. പാക് സൈന്യം അഭിനന്ദന്‍റെ പുതിയ വീഡിയോ എടുത്തതാണ് വൈകാനുള്ള കാരണമെന്നാണ് റിപ്പോർട്ട്. 

താന്‍ പാകിസ്താന്റെ വ്യോമാതിര്‍ത്തി ലംഘിച്ചെന്നും തന്റെ വിമാനം പാക് വ്യോമസേന വെടിവെച്ചിട്ടതാണെന്നും വീഡിയോയില്‍ അഭിനന്ദന്‍ പറയുന്നു.

തകര്‍ന്ന വിമാനം ഉപേക്ഷിച്ച് പാരച്ച്യൂട്ട് വഴി താഴെയിറങ്ങിയ തന്നെ പാക് സേനാംഗങ്ങളാണ് നാട്ടുകാരുടെ കൈയ്യില്‍ നിന്നും രക്ഷപ്പെടുത്തിയതെന്നും വീഡിയോയിലുണ്ട്.

സേനാ യൂണിറ്റിലെത്തിച്ച എനിക്ക് പ്രഥമ ശുശ്രൂഷ നല്‍കി. തുടര്‍ന്ന് എന്നെ ആശുപത്രിയിലേക്കു കൊണ്ടു പോയി. പാകിസ്താന്‍ സേന പ്രഫഷനല്‍ മികവോടെയാണു പ്രവര്‍ത്തിക്കുന്നത്. ഞാന്‍ അവര്‍ക്കൊപ്പം സമയം ചെലവഴിച്ചു. ഇന്ത്യന്‍ മാധ്യമങ്ങള്‍ ചെറിയ കാര്യങ്ങള്‍ പോലും പെരുപ്പിച്ചു കാട്ടുകയാണെന്നും അഭിനന്ദന്‍ പറയുന്നു.