ചങ്ങരംകുളം: സംസ്ഥാനപാതയില്‍ പാവിട്ടപ്പുറത്ത് കാറും ബൈക്കും കൂട്ടിയിടിച്ച് ബൈക്ക് യാത്രികന് പരിക്കേറ്റു. കാഞ്ഞിയൂര്‍ സ്വദേശി പള്ളത്ത് ഇസ്മാഈലിന്റെ മകന്‍ ഹബീബ് സുല്‍ത്താനാ(21)ണ് പരുക്കേറ്റത്.
തൃശൂര്‍-കുറ്റിപ്പുറം സംസ്ഥാനപാതയില്‍ പാവിട്ടപ്പുറത്തിനടുത്ത് മാങ്കുളത്ത് ഇന്നലെ ഉച്ചക്ക് ശേഷം മൂന്നോടെയാണ് അപകടം. തിരൂരില്‍നിന്ന് കേച്ചേരിയിലേക്ക് പോകുകയായിരുന്ന കാര്‍ നിയന്ത്രണം വിട്ട് എതിര്‍ദിശയില്‍ വന്നിരുന്ന കാറില്‍ ഇടിക്കുകയായിരുന്നു.
ഇടിയുടെ ആഘാതത്തില്‍ നിയന്ത്രണം വിട്ട കാര്‍ ചങ്ങരംകുളം ഭാഗത്തേക്ക് വന്നിരുന്ന ബൈക്കിലും ഇടിച്ചു.
അപകടത്തില്‍ ഗുരുതരമായി പരുക്കേറ്റ ഹബീബ് സുല്‍ത്താനെ നാട്ടുകാര്‍ ചങ്ങരംകുളത്തെ സ്വകാര്യ ആശുപത്രിയിലും തുടര്‍ന്ന് തൃശൂരിലെ സ്വകാര്യ ആശുപത്രിയിലും പ്രവേശിപ്പിച്ചു.
കാറുകള്‍ ഭാഗികമായി തകര്‍ന്നെങ്കിലും കാര്‍ യാത്രക്കാര്‍ പരുക്കില്ലാതെ രക്ഷപ്പെടുകയായിരുന്നു. ചങ്ങരംകുളം പൊലിസ് സ്ഥലത്തെത്തി മേല്‍നടപടികള്‍ സ്വീകരിച്ചു.