തൃശൂര്‍: സിനിമാ സ്റ്റൈലില്‍ എക്‌സൈസ് സംഘത്തെ കബളിപ്പിച്ച് സ്പിരിറ്റ് കടത്ത്.
എക്‌സൈസ് സംഘം പിന്തുടര്‍ന്നെങ്കിലും പാലിയേക്കര ടോള്‍ പ്ലാസയടക്കം തകര്‍ത്ത് സ്പിരിറ്റ് നിറച്ച പിക്കപ്പ്‌വാന്‍ കടന്നുകളഞ്ഞു. വാഹനത്തിന്റെ നമ്പര്‍ വ്യാജമാണെന്ന് പിന്നീട് പരിശോധനയില്‍ വ്യക്തമായി. സംഭവത്തില്‍ അന്വേഷണം ഊര്‍ജിതമാക്കിയതായി എക്‌സൈസ് അറിയിച്ചു.ചാലക്കുടിയിലെ സ്വകാര്യ ഹോട്ടലിന്റെ പാര്‍ക്കിങ്ങില്‍ സ്പിരിറ്റ് കൈമാറ്റം ചെയ്യുമെന്ന രഹസ്യവിവരത്തെ തുടര്‍ന്ന് എക്‌സൈസ് സംഘം പരിശോധനയ്ക്ക് എത്തുകയായിരുന്നു. എക്‌സൈസ് സംഘത്തെ കണ്ടനിമിഷം ഡ്രൈവര്‍ പിക്കപ്പ്‌വാന്‍ പുറത്തേക്കെടുത്ത് കുതിച്ചു.
എക്‌സൈസ് സംഘം വിടാതെ പിന്തുടര്‍ന്നു. തൃശൂര്‍ ഭാഗത്തേക്ക് പാഞ്ഞ പിക്കപ്പ്‌വാന്‍ പാലിയേക്കര ടോള്‍ പ്ലാസയില്‍ നിര്‍ത്താതെ ബൂം ബാരിയര്‍ ഇടിച്ചുതെറിപ്പിച്ച് കുതിക്കുകയായിരുന്നു.പിന്നീട് ഊടുവഴികളിലേക്ക് ഇറക്കിയും ദേശീയപാതയില്‍ കയറ്റിയും കുതിച്ച വാഹനത്തിന് പിന്നാലെ എക്‌സൈസ് സംഘവും പാഞ്ഞു. ഇതിനിടെ എക്‌സൈസ് സംഘം പൊലിസിനും വിവരങ്ങള്‍ കൈമാറി.
പട്ടിക്കാട് വച്ച് പൊലിസ് വാഹനം തടഞ്ഞെങ്കിലും അതിസാഹസികമായി പിക്കപ്പ്‌വാന്‍ വെട്ടിച്ചുകടന്നു. കുതിരാന്‍ വഴി പാലക്കാട്ടേക്കാണ് വാഹനത്തിന്റെ പോക്കെന്ന കണക്കുകൂട്ടലില്‍ കൂടുതല്‍ പൊലിസുകാര്‍ വാഹന പരിശോധനയ്‌ക്കെത്തി. എന്നാല്‍, പിക്കപ്പ്‌വാന്‍ പാലക്കാട് എത്തുന്നതിന് തൊട്ടുമുമ്പ് മംഗലം ഭാഗത്തേക്കുള്ള വഴിതിരിഞ്ഞ് മറയുകയായിരുന്നു. പിന്നീട് വ്യാപക തിരച്ചില്‍ നടത്തിയെങ്കിലും പിക്കപ്പ്‌വാന്‍ കണ്ടെത്താന്‍ സാധിച്ചില്ല. തുടര്‍ന്ന് വിഡിയോ ദൃശ്യങ്ങള്‍ പരിശോധിച്ചപ്പോഴാണ് വാഹനത്തിന്റെ നമ്പര്‍ വ്യാജമാണെന്ന് വ്യക്തമായത്.
ഡ്രൈവര്‍ മാത്രമായിരുന്നു വാഹനത്തിലുണ്ടായിരുന്നതെന്ന് പൊലിസ് പറഞ്ഞു.