കല്‍പ്പറ്റ: എം.എസ്.എഫ് കല്‍പ്പറ്റ നിയോജക മണ്ഡലം കമ്മിറ്റിയുടെ ആഭിമുഖ്യത്തില്‍ ഫാസിസ്റ്റു ഭീകരതക്കെതിരെ പ്രചാരണ കാംപയിന്‍ സംഘടിപ്പിക്കുന്നു.
 വിദ്യാര്‍ഥികള്‍ക്കിടയില്‍ സഹിഷ്ണുതയുടെയും മതേതരത്വത്തിന്റെയും പ്രധാന്യം ബോധ്യപ്പെടുത്തുക എന്ന ലക്ഷ്യത്തോടെയാണ് കാംപയിന്‍ സംഘടിപ്പിക്കുന്നത്. കാംപയിനിന് തുടക്കം കുറിച്ച് ഈ മാസം 13, 14 തിയതികളില്‍ റിപ്പണ്‍ -കാന്തപ്പാറയില്‍ (ഇ അഹമ്മദ് സാഹിബ് നഗര്‍) ട്രൈ ടു റെഡി എഗൈന്‍സ്റ്റ് ഫാസിസം (ട്രാഫ്) എന്ന പേരില്‍ എക്‌സിക്യുട്ടിവ് ക്യാംപ് സംഘടിപ്പിക്കും.
കാംപയിനിന്റെ ഭാഗമായി സെമിനാറുകള്‍, വിദ്യാര്‍ഥി റാലികള്‍, കൊളാഷ് പ്രദര്‍ശനങ്ങള്‍, രചനാ മത്സരങ്ങള്‍ സംഘടിപ്പിക്കും. രാഷ്ട്രീയ സാമൂഹിക സാംസ്‌കാരിക രംഗത്തെ പ്രമുഖര്‍ കാംപയിനില്‍ സംബന്ധിക്കും.
യോഗത്തില്‍ പ്രസിഡന്റ് മുനീര്‍ വടകര അധ്യക്ഷനായി. അബ്ബാസ് വാഫി ചെന്നലോട്, നുഹൈസ് മില്ലുമുക്ക്, അനസ് വെങ്ങപ്പള്ളി, ആഷിഖ് ആനപ്പാറ സംസാരിച്ചു. ജനറല്‍ സെക്രട്ടറി ഷംസീര്‍ ചോലക്കല്‍ സ്വാഗതവും ട്രഷറര്‍ ജവാദ് വൈത്തിരി നന്ദിയും പറഞ്ഞു.