ജിദ്ദ: വിമാനത്താവളത്തില്‍ ഉപേക്ഷിക്കപ്പെട്ട ഇന്ത്യന്‍ വീട്ടുവേലക്കാരി സാമൂഹിക പ്രവര്‍ത്തകരുടെ സഹായത്തോടെ നാട്ടിലേക്ക് മടങ്ങി. സ്‌പോണ്‍സര്‍ പറഞ്ഞു പറ്റിച്ച് എയര്‍പോര്‍ട്ടില്‍ ഉപേക്ഷിച്ചതിനാല്‍ ദമ്മാം വനിതാ അഭയകേന്ദ്രത്തില്‍ എത്തപ്പെട്ട തെലുങ്കാന സ്വദേശിനിയായ മാര്‍ഗരറ്റ് ആണ് നാട്ടിലേയ്ക്ക് മടങ്ങിയത്.

 

രണ്ടു വര്‍ഷം മുമ്പ് സ്വദേശിയുടെ വീട്ടുജോലിക്കാരിയായി എത്തിയ ഇവര്‍ പ്രശ്‌നങ്ങള്‍ക്കിടയിലും അവിടെ തുടരുകയായിരുന്നു. രണ്ടു വര്‍ഷത്തിനു ശേഷം, തൊഴില്‍ കരാര്‍ കാലാവധി കഴിഞ്ഞ സാഹചര്യത്തില്‍ നാട്ടിലേക്ക് ഫൈനല്‍ എക്‌സിറ്റില്‍ മടങ്ങണമെന്ന് മാര്‍ഗരറ്റ് സ്‌പോണ്‍സറെ അറിയിച്ചെങ്കിലും സമ്മതിച്ചില്ല.

 

അവസാനം ഫൈനല്‍ എക്‌സിറ്റ് അടിച്ചെന്ന വ്യാജേന എയര്‍പോര്‍ട്ടിലേക്ക് കൂട്ടിക്കൊണ്ടു പോയ സ്‌പോണ്‍സര്‍, ദമാം എയര്‍പോര്‍ട്ടില്‍ അവരെ ഉപേക്ഷിച്ച് കടന്നു കളയുകയായിരുന്നു. കരാര്‍ അവസാനിക്കുമ്പോള്‍ നല്‍കാനുള്ള ആനുകൂല്യങ്ങളും ടിക്കറ്റും നല്‍കാതിരിക്കാന്‍ സ്‌പോണ്‍സര്‍ കണ്ടുപിടിച്ച മാര്‍ഗമായിരുന്നു ഇത്.

 

എയര്‍പോര്‍ട്ടില്‍ അനാഥയായി അലയുന്നത് കണ്ട മാര്‍ഗരറ്റിനെ എയര്‍പോര്‍ട്ട് അധികൃതര്‍ സഊദി പൊലിസിന് കൈമാറുകയും ദമാം വനിതാ അഭയകേന്ദ്രത്തില്‍ എത്തിക്കുകയും ചെയ്തു. അഭയകേന്ദ്രത്തില്‍ എത്തിയ ഇവരെ എക്‌സിറ്റ് അടിച്ചു കിട്ടാന്‍ നവയുഗം ജീവകാരുണ്യപ്രവര്‍ത്തക മഞ്ജു മണിക്കുട്ടനും സഹപ്രവര്‍ത്തകരും സ്‌പോണ്‍സറെ സമീപിച്ചെങ്കിലും ഫലമുണ്ടായില്ല.

 

തുടര്‍ന്നാണ് അഭയകേന്ദ്രം അധികൃതരുടെ സഹായത്തോടെ മാര്‍ഗരറ്റിന് ഫൈനല്‍ എക്‌സിറ്റ് അടിച്ച് കിട്ടിയത്.