കണ്ണൂര്‍: പിണറായി സാംസ്‌കാരിക സമിതിയുടെ ആഭിമുഖ്യത്തില്‍ സംഘടിപ്പിക്കുന്ന പിണറായി പെരുമ സര്‍ഗോത്സവം ഇന്ന് തുടങ്ങും.
 13 വരെ പിണറായി എ.കെ.ജി ഗവ. ഹയര്‍ സെക്കന്‍ഡറി സ്‌കൂളില്‍ നടക്കുന്ന പരിപാടി വൈകുന്നേരം ആറിനു സിനിമാതാരം മഞ്ജുവാര്യര്‍ ഉദ്ഘാടനം ചെയ്യും. പി ബാലന്‍ അധ്യക്ഷനാവും.
 10ന് കെ.പി.എ.സി ലളിത, 11ന് ടി പത്മനാഭന്‍, 12ന് ഐ.എം വിജയന്‍, സമാപന ദിവസമായ 13ന് അടൂര്‍ ഗോപാലകൃഷ്ണന്‍ അടക്കം പ്രമുഖ കലാകാരന്‍മാര്‍ മേളയില്‍ സംബന്ധിക്കും. ഉദ്ഘാടന ദിവസം വൈകുന്നേരം ഏഴിനു മഞ്ജുവാര്യരും സംഘവും അവതരിപ്പിക്കുന്ന കുച്ചുപ്പുടി അരങ്ങേറും. 13നു നടക്കുന്ന സമാപന സമ്മേളനം മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. കെ.കെ രാഗേഷ് എം.പി അധ്യക്ഷനാവും.
മേളയില്‍ കഥാപ്രസംഗം, മാജിക് ഷോ, കഥയരങ്ങ്, കവിയരങ്ങ്, ചിരിയരങ്ങ്, ഭരതനാട്യം, ഗാനമേള, നാടകം, സിനിമ പ്രദര്‍ശനം, ഭക്ഷ്യമേള, അന്താരാഷ്ട്ര നാണയ പ്രദര്‍ശനം, ഫോട്ടോ പ്രദര്‍ശനം എന്നിവ അരങ്ങേറും. പരിപാടിയുടെ ഒരുക്കങ്ങള്‍ പൂര്‍ത്തിയായതായി സംഘാടക സമിതി ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു.
കെ.കെ രാജീവന്‍, ഒ.വി ജനാര്‍ദ്ദനന്‍, കെ.യു ബാലകൃഷ്ണന്‍, ടി.പി രാജീവന്‍, എ നിഖില്‍ കുമാര്‍ സംബന്ധിച്ചു.