കണ്ണൂര്‍: രാഷ്ട്രീയമായ ദുഷ്ടലാക്കോടെ ജില്ലയിലെ മുസ്‌ലിം മഹല്ലുകളില്‍ അരാജകത്വം സൃഷ്ടിക്കാനുള്ള സി.പി.എം നീക്കങ്ങള്‍ക്കെതിരേ ജാഗ്രതപാലിക്കാന്‍ മുസ്‌ലിംലീഗ് ജില്ലാ പ്രവര്‍ത്തകസമിതി യോഗം ആഹ്വാനം ചെയ്തു. ആജ്ഞാനുവര്‍ത്തികളുടെ പിന്തുണയോടെ മഹല്ല് ഭരണത്തില്‍ ഇടപെട്ട് രാഷ്ട്രീയ അടിത്തറ സൃഷ്ടിച്ചെടുക്കാനുള്ള ശ്രമം സി.പി.എം നേരത്തെ ആരംഭിച്ചിരുന്നു.
ഇതിന്റെ ഭാഗമായി പുറത്തീല്‍, മാങ്ങാട് മഹല്ലുകളിലെ ഭരണപരമായ കാര്യങ്ങളില്‍ സി.പി.എം കാണിക്കുന്ന അമിത താല്‍പര്യം മനസിലാക്കാവുന്നതേയുള്ളൂ. അരിയില്‍ അബ്ദുല്‍ഷുക്കൂര്‍ വധത്തെതുടര്‍ന്നു വെള്ളിയാഴ്ചത്തെ ജുമുഅ പ്രാര്‍ഥനയ്ക്കു ശേഷം പള്ളികളുടെ പുറത്തുവച്ച് ലീഗ് പ്രവര്‍ത്തകര്‍ ഫണ്ട് ശേഖരണം നടത്തിയപ്പോള്‍ ജില്ലാ ഭരണകൂടത്തിനും പൊലിസിനും പരാതി നല്‍കിയ സി.    പി.എം ജില്ലാസെക്രട്ടറി പുതിയ ആദര്‍ശ രാഷ്ട്രീയത്തിന്റെ വക്താവായി രംഗപ്രവേശനം ചെയ്തിരിക്കുകയാണെന്നും ജില്ലാകമ്മിറ്റി ചൂണ്ടിക്കാട്ടി.
പാര്‍ട്ടി നേതാക്കളെന്ന നിലയില്‍ മഹല്ല് ഭരണത്തിന്റെ ഓരോതലങ്ങളിലും ജാഗ്രത പാലിക്കേണ്ടതു പാര്‍ട്ടി പ്രവര്‍ത്തകരുടെ കര്‍ത്തവ്യമാണ്.
എന്നാല്‍ ഇതിനു വിരുദ്ധമായുള്ള നീക്കങ്ങള്‍ ആശാസ്യമല്ല. അത്തരം പ്രവണതകള്‍ പാര്‍ട്ടി ഗൗരവപൂര്‍വം കാണും. പുറത്തീല്‍ മഹല്ല് ജമാഅത്തുമായി ബന്ധപ്പെട്ട് ഉയര്‍ന്ന പ്രശ്‌നങ്ങള്‍ അന്വേഷിക്കാന്‍ എസ്. മുഹമ്മദ് കണ്‍വീനറും കെ.എ ലത്തീഫ്, ഇബ്രാഹിംകുട്ടി തിരുവട്ടൂര്‍ എന്നിവര്‍ അംഗങ്ങളുമായി മൂന്നംഗ അന്വേഷണസമിതിയെ നിയോഗിച്ചു.
ജില്ലാപ്രസിഡന്റ് പി. കുഞ്ഞിമുഹമ്മദ് അധ്യക്ഷനായി. സംസ്ഥാന വൈസ് പ്രസിഡന്റ് വി.കെ അബ്ദുല്‍ഖാദര്‍ മൗലവി, അബ്ദുല്‍കരീം ചേലേരി, വി.പി വമ്പന്‍, പെരിങ്ങോം മുസ്തഫ, എസ്. മുഹമ്മദ്, ടി.എ തങ്ങള്‍, പി.ഒ.പി മുഹമ്മദലി ഹാജി, യു.വി മൂസ ഹാജി, ഇബ്രാഹിംകുട്ടി തിരുവട്ടൂര്‍, കെ.എ ലത്തീഫ്, പി.വി സൈനുദീന്‍, അന്‍സാരി തില്ലങ്കേരി, എന്‍.പി താഹിര്‍ഹാജി, കെ.മുഹമ്മദലി സംസാരിച്ചു.