കൊല്ലം: ചക്രഷൂവില്‍ നടന്നും തെന്നിയും നീങ്ങുന്ന കുരുന്നുകള്‍ ഉള്‍പ്പെടെയുള്ളവരുടെ അവധിക്കാല  ജില്ലാതല റോളര്‍ സ്‌കേറ്റിംഗ് പരിശീലനം കൊല്ലത്ത് തുടങ്ങി. ഒരു മണിക്കൂര്‍ വീതം രാവിലെ ആശ്രാമം അഡ്വഞ്ചര്‍ പാര്‍ക്കിലും വൈകിട്ട് ലാല്‍ബഹദൂര്‍ സ്റ്റേഡിയത്തിന് മുന്നിലുമാണ് പരിശീലനം.
വിദഗ്ധ പരിശീലനത്തിനായി ജില്ലാ സംസ്ഥാന താരങ്ങളും ജില്ലയുടെ വിവിധ  ഭാഗങ്ങളില്‍ നിന്നെത്തിയവരും ക്യാമ്പിലുണ്ട്. കോര്‍പ്പറേഷന്‍ കായിക വിദ്യാഭ്യാസ സ്ഥിരംസമിതി അധ്യക്ഷന്‍ ടി.ആര്‍ സന്തോഷ്‌കുമാര്‍ ക്യാമ്പ്  ഉദ്ഘാടനം ചെയ്തു. മുന്‍ കേരളാ ടീം ക്യാപ്റ്റനും ദേശീയ റോളര്‍ ഹോക്കി അമ്പയറുമായ പി.ആര്‍ ബാലഗോപാലാണ് പരിശീലനത്തിന് നേതൃത്വം നല്‍കുന്നത്. കഴിഞ്ഞ 31 വര്‍ഷമായി ക്യാമ്പ് നടക്കുന്നുണ്ടെന്നും അവധിക്കാല ക്യാമ്പിനെ തുടര്‍ന്ന് വിദഗ്ധ പരിശീലനം നേടിയവര്‍ ഇക്കഴിഞ്ഞ ജില്ലാ സംസ്ഥാന ചാമ്പ്യന്‍ഷിപ്പില്‍ മികച്ച നേട്ടം  നേടിയതായും ബാലഗോപാല്‍ പറഞ്ഞു. കൊല്ലം റോളര്‍ സ്‌കേറ്റിംഗ് ക്ലബ് നടത്തുന്ന പരിശീലനം മെയ് 30ന് മാപിക്കുമെന്നും താത്പര്യമുള്ളവര്‍ക്ക് ഇനിയും പ്രവേശനം നല്‍കുമെന്നും സംഘാടകര്‍ അറിയിച്ചു. ഫോണ്‍: 9447230830.