കരിമ്പ: കഴിഞ്ഞ ദിവസം രാത്രി പന്ത്രണ്ടു മണിക്ക് കരിമ്പയില്‍ അപകടത്തില്‍പ്പെട്ട ബൈക്ക് യാത്രികരായ യുവാക്കള്‍ക്ക് രക്ഷയായത് അതുവഴി യാദൃച്ഛികമായി കടന്നുവന്ന ഹൈവേ പൊലിസ് സംഘം. പരുക്കേറ്റ് റോഡരികില്‍ കിടന്നിരുന്ന ചെറുപ്പക്കാരെ യഥാസമയം ആശുപത്രിയിലെത്തിച്ച് ചികിത്സ നല്‍കി. ഇവര്‍ ബന്ധപ്പെട്ടവരെ അറിയിച്ചതിനെ തുടര്‍ന്ന് പിന്നീട് വീട്ടുകാരെത്തുകയായിരുന്നു.
എലമ്പുലാശ്ശേരി കരിയോടുള്ള അനു, വിനു എന്നീ രണ്ട് യുവാക്കള്‍ക്കാണ് ബൈക്കപകടത്തില്‍ പരുക്കേറ്റത്. രാത്രി പട്രോളിങ് നടത്തിയിരുന്ന ഹൈവേ പൊലിസ് പരുക്കേറ്റവരെ പൊലിസ് വാഹനത്തില്‍ കയറ്റി ഉടനെ തച്ചമ്പാറ ഇസാഫ് ആശുപത്രയില്‍ എത്തിച്ചു.
പിന്നീട് പെരിന്തല്‍മണ്ണ മൗലാന ഹോസ്പിറ്റലിലും എത്തിക്കുകയായിരുന്നു. മണ്ണാര്‍ക്കാട് സ്റ്റേഷനിലെ ട്രാഫിക് എസ്.ഐ അന്‍വര്‍ ഹുസൈന്‍, സിവില്‍ പൊലിസ് ഓഫിസര്‍മാരായ കല്ലടിക്കോട് സ്റ്റേഷനിലെ വിനോദ്, ഹൈവേ പട്രോളിലെ വിനോദ് എന്നിവരാണ് കൃത്യനിര്‍വഹണത്തിലെ മികവ് കൊണ്ട് പ്രശംസനേടിയത്. പരുക്കേറ്റവര്‍ സുഖംപ്രാപിച്ചു വരുന്നതായി ബന്ധുക്കള്‍ അറിയിച്ചു.