തൃക്കരിപ്പൂര്‍: ജില്ലാ ഫുട്‌ബോള്‍ അസോസിയേഷന്‍ തൃക്കരിപ്പൂര്‍ സിന്തറ്റിക്ക് സ്റ്റേഡിയത്തില്‍ സംഘടിപ്പിച്ചുവരുന്ന സംസ്ഥാന ക്ലബ് ഫുട്‌ബോള്‍ ചാംപ്യന്‍ഷിപ്പില്‍ ഇന്നലെ  നടന്ന അവസാന സെമി ഫൈനല്‍ മത്സരത്തില്‍ കേരളാ പൊലിസിനെ രണ്ടിനെതിരേ ഏഴു ഗോളുകള്‍ക്കു കീഴടക്കി എസ്.ബി.ഐ ഫൈനലില്‍ കടന്നു.
എട്ടോളം സന്തോഷ് ട്രോഫി താരങ്ങളുമായി ഇറങ്ങിയ എസ്.ബി.ഐ കളിയുടെ തുടക്കം മുതല്‍ സ്റ്റേഡിയത്തിന്റെ ആധിപത്യം ഏറ്റെടുത്തിരുന്നു. കളി തുടങ്ങി രണ്ടു മിനുട്ടു തികയും മുന്‍പേ എസ്.ബി. ഐ പൊലിസിന്റെ വല ചലിപ്പിച്ചു. ആദ്യ പകുതി അവസാനിക്കുന്നതിനു മുന്‍പ് തന്നെ മറുപടിയില്ലാത്ത മൂന്നു ഗോളുകള്‍ക്കു ബാങ്ക് മുന്നിട്ടു നിന്നിരുന്നു.
രണ്ടാം പകുതിയില്‍ പൊലിസ് ഉണര്‍ന്നു കളിച്ചെങ്കിലും ബാങ്കിന്റെ താരങ്ങള്‍ക്കു മുന്നില്‍ പിടിച്ചു നില്‍ക്കാന്‍ ഏറെ പ്രയാസപ്പെട്ടു. ബാങ്ക് നാലു ഗോളുകള്‍ കൂടി പൊലിസിന്റെ വലയിലാക്കി. ഏറെ പൊരുതി നോക്കിയെങ്കിലും രണ്ടു ഗോളുകള്‍ മടക്കി നല്‍കി പൊലിസ് സംതൃപ്തിയടഞ്ഞു. ഇന്നു നടക്കുന്ന കലാശപ്പോരാട്ടത്തില്‍ തുല്യ ശക്തികളായ എസ്.ബി.ഐയും ഗോകുലം എഫ്.സി മലപ്പുറവും തമ്മില്‍ ഏറ്റുമുട്ടും. ഇന്നു നടക്കുന്ന ഫൈനലില്‍ ഗോകുലം എഫ്.സിയും എസ്.ബി.ഐയും തമ്മില്‍ ഏറ്റുമുട്ടും.