മുട്ടില്‍: താഴെ മുട്ടിലില്‍ വന്‍ പാന്‍മസാല വേട്ട. ആയിരത്തിലധികം പാക്കറ്റ് പാന്‍മസാലയാണ് എക്‌സൈസ് സംഘം പിടികൂടിയത്.
 മുട്ടില്‍ ഡബ്ല്യു.എം.ഒ കോളജിന് സമീപത്തെ പലചരക്ക് കടയില്‍ നിന്നുമാണ് മുട്ടില്‍ എക്‌സൈസ് സര്‍ക്കിള്‍ ഇന്‍സ്‌പെക്ടര്‍ കെ.ടി ജെയിംസിന്റെ നേതൃത്വത്തില്‍ പാന്‍മസാല പിടികൂടിയത്. സംഭവവുമായി ബന്ധപ്പെട്ട് കടയുടമയായ താഴെമുട്ടില്‍ വടക്കേതില്‍ വേലുക്കുട്ടിക്കെതിരെ കേസെടുത്തു. കടകേന്ദ്രീകരിച്ച് പാന്‍മസാല വില്‍പന വ്യാപകമായെന്ന പരാതിയെതുടര്‍ന്ന് നടത്തിയ പരിശോധനയിലാണ് പാന്‍മസാല പിടിച്ചെടുത്തത്. ദിവസങ്ങളായി നടത്തിയ നിരീക്ഷണത്തിനൊടുവിലാണ് ഇയാളെ പിടികൂടിയത്. കോളജ് കുട്ടികള്‍, അന്യസംസ്ഥാന തൊഴിലാളികള്‍ എന്നിവര്‍ ഇയാളുടെ സ്ഥിരം ഉപഭോക്താക്കളാണ്. കര്‍ണാടകയില്‍ നിന്നാണ് ഇയാള്‍ ഹാന്‍സ് കടയിലേക്ക് എത്തിക്കുന്നത്. എക്‌സൈസ് പ്രിവന്റീവ് ഓഫിസര്‍ കെ.വി സാജുമോന്‍, സിവില്‍ എക്‌സൈസ് ഓഫിസര്‍മാരായ ഏല്യാസ്, കെ.എം ലത്തീഫ്, വി രഘു റെയിഡിന് നേതൃത്വം നല്‍കി.