സെന്റ്പീറ്റേഴ്‌സ്ബര്‍ഗ്: ഗ്രൂപ്പ് ഇയിലെ മത്സരത്തില്‍ ബ്രസീല്‍ കോസ്റ്റ റിക്കയെ നേരിടും. ഇന്ത്യന്‍ സമയം വൈകിട്ട് 5.30നാണ് മത്സരം. ആദ്യ മത്സരത്തില്‍ സ്വിറ്റ്‌സര്‍ലന്റിന് മുന്നില്‍ 1-1 സമനിലയില്‍ കുരുങ്ങിയ ബ്രസീലിന് പ്രീക്വാര്‍ട്ടറിലെത്തണമെങ്കില്‍ ഇന്ന് ജയിക്കണം. ഗ്രൂപ്പിലെ ദുര്‍ബലരാണെങ്കിലും അട്ടിമറിക്ക് കെല്‍പ്പുള്ളവരാണ് കോസ്റ്റ റിക്ക. പരിശീലനത്തിനിടെ പരുക്കേറ്റ സൂപ്പര്‍ താരം നെയ്മര്‍ മത്സരത്തിനിറങ്ങുമെന്നത് ബ്രസീലിന് മൂന്‍തൂക്കം നല്‍കുന്നുണ്ട്.
ബ്രസീലും കോസ്റ്റ റിക്കയും തമ്മില്‍ 10 തവണ ഏറ്റുമുട്ടിയപ്പോള്‍ ഒന്‍പത് തവണയും ബ്രസീലിനായിരുന്നു വിജയം. 1960ലാണ് കോസ്റ്റ റിക്ക ബ്രസീലിനെ പരാജയപ്പെടുത്തിയത്. ലോകകപ്പില്‍ ഇത് മൂന്നാം തവണയാണ് കോസ്റ്റ റിക്ക ബ്രസീലിനെ നേരിടുന്നത്. ഗ്രൂപ്പിലെ ആദ്യ മത്സരത്തില്‍ സെര്‍ബിയയോട് പരാജയപ്പെട്ട കോസ്റ്റ റിക്ക പുറത്താകലിന്റെ വക്കിലാണ്. സ്വിറ്റ്‌സര്‍ലന്റിന് മുന്നില്‍ സമനിലയില്‍ കുടുങ്ങിയ ബ്രസീലിനും ഈ മത്സരം നിര്‍ണായകമാണ്. ഗ്രൂപ്പ് ഇയില്‍ മൂന്ന് പോയിന്റുമായി സെര്‍ബിയയാണ് മുന്നിലുള്ളത്. ഓരോ പോയിന്റുമായി ബ്രസീലും സ്വിറ്റ്‌സര്‍ലന്റും തൊട്ടുപിന്നിലുണ്ട്. കോസ്റ്റ റിക്കന്‍ ഗോള്‍കീപ്പര്‍ കെയ്‌ലര്‍ നവാസിന്റെ മിന്നും ഫോമാണ് ബ്രസീലിനെ അലട്ടുന്നത്. നവാസ് ഗോള്‍ വലക്ക് മുന്നില്‍ വന്‍മതില്‍ സൃഷ്ടിച്ചാല്‍ ബ്രസീല്‍ വിയര്‍ക്കേണ്ടി വരും.
ഗ്രൂപ്പിലെ മറ്റൊരു മത്സരത്തില്‍ സ്വിറ്റ്‌സര്‍ലന്റ് സെര്‍ബിയയെ നേരിടും. ഇന്ത്യന്‍ സമയം രാത്രി 11.30നാണ് മത്സരം. ഷാക്കിരിയുടെ നേതൃത്വത്തിലുള്ള സ്വിസ് പടയും കൊളറോവിന്റെ നേതൃത്വത്തിലുള്ള സെര്‍ബിയയും തുല്യ ശക്തികളാണ്.
കഴിഞ്ഞ മത്സരത്തില്‍ കോസ്റ്ററിക്കക്കെതിരേ കൊളറോവ് നേടിയ ഫ്രീക്കിക്ക് ഗോള്‍ റഷ്യന്‍ ലോകകപ്പിലെ മനോഹര ഗോളുകളിലൊന്നാണ്. ഗ്രൂപ്പില്‍ മൂന്ന് പോയിന്റുള്ള സെര്‍ബിയക്കും ഒരു പോയിന്റുള്ള സ്വിറ്റ്‌സര്‍ലന്റിനും ഈ കളി നിര്‍ണായകമാണ്.