വൈത്തിരി: വയനാട്ടില്‍ മാവോയിസ്റ്റ് സംഘവും പൊലിസും തമ്മില്‍ നേര്‍ക്കുനേര്‍ വെടിയുതിര്‍ത്തു. ലക്കിടിക്ക് സമീപത്തെ ഉപവന്‍ റിസോര്‍ട്ട് പരിസരത്ത് വച്ചാണ് വെടിയുതിര്‍ത്തത്.
മാവോയിസ്റ്റുകള്‍ ആദ്യം പൊലിസിന് നേരെ വെടിയുതിര്‍ക്കുകയായിരുന്നു. രാത്രി 9.45 ഓടെ ആണ് സംഭവം. വെടിയൊച്ച കേട്ടതായി പ്രദേശവാസികള്‍ വിവരം അറിയിച്ചതോടെയാണ് സ്ഥലത്ത് പൊലിസും തണ്ടര്‍ ബോള്‍ട്ട് സേനയും എത്തിയത്. ഈ സമയം പൊലിസിന് നേരെ മാവോയിസ്റ്റുകള്‍ വീണ്ടും വെടിവച്ചു. ഒരു മാവോയിസ്റ്റിന് ഗുരുതരമായി പരുക്കേറ്റു. സ്ഥലത്ത് കൂടുതല്‍ പൊലിസ് സംഘം എത്തി. ദേശീയ പാതയില്‍ വൈത്തിരിയിലും തളിപ്പുഴയിലുമായി പൊലിസ് വാഹന പരിശോധനയും നടത്തി. പരുക്കേറ്റ വ്യക്തിയുടെ പൂര്‍ണ വിവരങ്ങള്‍ ലഭിച്ചിട്ടില്ല. എന്നാല്‍, പരുക്ക് ഗുരുതരമാണെന്നാണ് ലഭിക്കുന്ന വിവരങ്ങള്‍.