കണ്ണൂര്‍: പ്രവാസികളുമായി കണ്ണൂരിലേക്കും മംഗളൂരുവിലേക്കുമുള്ള ആദ്യ വിമാനം ഇന്ന്. ദുബൈയില്‍ നിന്നുള്ള 177 യാത്രക്കാരുമായാണ് കണ്ണൂരിലേക്കും മംഗളൂരുവിലേക്കും എയര്‍ഇന്ത്യാ എക്‌സ്പ്രസ് വിമാനം സര്‍വിസ് നടത്തുക. ഇതിനായി യാത്രക്കാരില്ലാതെ പ്രത്യേക വിമാനം ഇന്നു രാവിലെ 10.30ന് കണ്ണൂരില്‍ നിന്നും ഉച്ചയ്ക്ക് 12.40ന് മംഗളൂരുവില്‍ നിന്നു ദുബൈയിലേക്കു തിരിക്കും.
പ്രവാസികളുമായി യു.എ.ഇ സമയം രണ്ടിന് ദുബൈയില്‍ നിന്നു പുറപ്പെടുന്ന വിമാനം രാത്രി 7.10ന് കണ്ണൂര്‍ വിമാനത്താവളത്തില്‍ എത്തിച്ചേരും. കണ്ണൂരിലേക്കുള്ള യാത്രക്കാരില്‍ 162 പേര്‍ മുതിര്‍ന്നവരും 15 കുട്ടികളും അഞ്ചു നവജാത ശിശുക്കളുമാണ്.
മംഗളൂരുവിലേക്കുള്ള വിമാനം യു.എ.ഇ സമയം വൈകിട്ട് 4.10ന് ദുബൈയില്‍ നിന്നു പുറപ്പെട്ട് രാത്രി 9.10ന് എത്തിച്ചേരും.
റിയാദ്-കണ്ണൂര്‍ വിമാനം 20ന്
കണ്ണൂര്‍: പ്രവാസികളുമായി സഊദി അറേബ്യയിലെ റിയാദില്‍ നിന്നു കണ്ണൂരിലേക്ക് 20നു പ്രത്യേക വിമാന സര്‍വിസ്. എയര്‍ഇന്ത്യയാണു സര്‍വിസ് നടത്തുക. 20നു മുംബൈയില്‍ നിന്നു തിരിക്കുന്ന വിമാനം കണ്ണൂരിലെത്തി മുംബൈയിലേക്കു തിരിക്കും. മുംബൈയില്‍ ഇറങ്ങാന്‍ താല്‍പര്യം അറിയിച്ച പ്രവാസികളെയും ഈ വിമാനത്തില്‍ ഉള്‍പ്പെടുത്തും.